اسرائیل اپنی شرمندگی چھپانے کے لئے جھوٹے دعوے کر رہا ہے :ابو عبیدہ

اسلامی تحریک مزاحمت (حماس) کے عسکری ونگ القسام بریگیڈ کے ترجمان ابو عبیدہ نے اسرائیلی دعوے کو بے بنیاد قرار دیا ہے- انہوں نے کہا کہ القسام بریگیڈ کی عسکری طاقت کو تباہ کرنے کا اسرائیلی دعوی جھوٹ ہے- اسرائیل غزہ میں اپنی فوج کی شکست کی شرمندگی دور کرنے کے لیے اس طرح کی جھوٹی کہانیاں گھڑ رہا ہے- القسام بریگیڈ کی عسکری طاقت کو تھوڑا بہت نقصان ہواتھا اس کا ازالہ کیا جا چکا ہے- ابو عبیدہ نے اسرائیلی خفیہ ادارے موساد کے بیان کا جواب دیتے ہوئے کہاکہ حماس نے جنگ میں کوئی اہداف متعین نہیں کئے تھے- اسرائیل نے غزہ پر جنگ مسلط کرتے ہوئے اپنے اہداف کا اعلان کیا تھا جس میں وہ مکمل طور پر ناکام رہا ہے – ابو عبیدہ نے کہا کہ اسرائیل چار برس سے غزہ پر فوج کشی کے منصوبے بنا رہا تھا- اس نے غزہ پر فوج کشی کرتے ہوئے اعلان کیا تھا کہ اسرائیل کا ہدف غزہ میں فلسطینی حکومت کا خاتمہ ، مزاحمت کا صفایا، میزائل حملوں کو بند کرنا اور اسرائیلی یرغمال فوجی گیلاد شالیت کی رہائی ہے- اسرائیل ان اہداف میں سے کوئی بھی ہدف حاصل نہیں کرسکا- واضح رہے کہ موساد نے بیان میں کہا تھا کہ حماس غزہ جنگ میں کوئی ہدف حاصل نہیں کرسکی- ابو عبیدہ نے مزید کہاکہ مغربی کنارے میں فلسطینی مزاحمت جلد یا بدیر اٹھے گی- مغربی کنارے میں اسرائیل، امریکہ اور فلسطینی اتھارٹی نسل کشی کر رہی ہیں- لیکن مغربی کنارے کے فلسطینی ختم نہیں ہوں گے بلکہ قابض اسرائیل اور اس کے حواریوں کا خاتمہ ہو گا-