غزہ محاصرہ ختم ہونے سے خطے میں امن قائم ہو گا: گنگ

اونروا کے ڈائریکٹر جان گنگ نے کہا ہے کہ غزہ پٹی کا محاصرہ فوری طور پر اٹھایا جائے۔ یہ قدم محصورین غزہ کیلئے امداد ی سامان بھیجنے سے زیادہ ضروری ہے۔ انہوں نے ان خیالات کا اظہار غزہ میں ایک پریس کانفرنس میں کیا۔ انہوں نے واضح کیا کہ محاصرہ ختم ہونے سے خطے میں امن قائم ہو سکے گا اور عدم تحفظ کا احساس بھی ختم ہو گا۔ جان گنگ نے کہا کہ ان کے ادارے کو مسلسل محاصرے پر،جس نے 15 لاکھ لوگوں کی زندگی اجیرن بنا رکھی ہے،گہری تشویش ہے۔ انہوں نے سعودی حکومت کا شکریہ بھی ادا کیا جس نے غزہ شہریوں میں غذائی اجناس تقسیم کرنے کیلئے دو ملین ڈالر بطور امداد فراہم کئے ہیں۔ انہوں نے غزہ میں بجلی کے بحران کو ایک نئی آفت سے تشبیہہ دی اور کہا کہ اس بحران سے غزہ وادی میں نئے سنگین مسائل کھڑے ہونگے۔