شمالی غزہ میں ایک مزدور اسرائیلی فائرنگ سے زخمی

غزہ کی پٹی کے شمالی ضلع کے علاقے بیت لاھیا میں اسرائیلی فوج کی فائرنگ سے کام کرنے والا ایک فلسطینی مزدور زخمی ہو گیا۔ غزہ کی فوجی میڈیکل سروسز کے کوآرڈینیٹر ادھم ابوسلمیہ نے ’’مرکز اطلاعات فلسطین‘‘ کو بتایا کہ بیت لاھیا کے تباہ شدہ علاقے میں ملبہ اٹھانے والا ایک مزدور اپنے کام میں مصروف تھا کہ اسرائیلی فوج نے فائرنگ کر دی۔

ابو سلمیہ کے مطابق زخمی ہونے والے 46 سالہ مزدور کو شہید کمال عدوان ہسپتال منتقل کر دیا گیا ہے جہاں ان کا علاج کیا جا رہا ہے، ان کو درمیانے درجے کے زخم آئے ہیں۔ واضح رہے کہ فلسطینی میڈیکل سروسز کی حالیہ رپورٹ کے مطابق اسرائیلی سرحدوں سے ملحق غزہ کی پٹی کے علاقوں میں اسرائیلی فوج کے فلسطینی کسانوں پر حملوں میں تیزی آ رہی ہے اور اکتوبر کے مہینے میں اسرائیلی فوج کی فائرنگ سے تین فلسطینی مزدور شہید ہو چکے ہیں جبکہ درجنوں زخمی ان کے علاوہ ہیں۔ 2009ء کی غزہ جنگ کے بعد اسرائیل نے تاحال غزہ میں تعمیراتی میٹریل داخل کرنے کی اجازت نہیں دی ہے اور دو سال قبل اسرائیلی بمباری سے تباہ ہونے والے علاقے اب تک تعمیر نو کے منتظر ہیں۔