اسرائیل، لبنان کے مابین جھڑپیں، صہیونی فوجی ہلاک، چار لبنانی فوجی شہید

مقبوضہ فلسطین اور لبنان کے مابین سرحد پر اسرائیلی اور لبنانی فوج کے درمیان شروع ہونے والی جھڑپوں میں ایک صہیونی فوجی ہلاک اور متعدد زخمی ہو گئے جبکہ ایک صحافی سمیت لبنان کے چار باشندے شہید اور پانچ زخمی ہو گئے ہیں۔ جھڑپیں اس وقت شروع ہوئیں جب عدسیہ کے مقام پر اسرائیلی فوج نے لبنان میں داخل ہونے کی کوشش کی۔ اسرائیلی فوج کے اعلی اختیاراتی ذرائع نے صہیونی فوجی کی ہلاکت کی تصدیق کر دی جبکہ ’’المنار‘‘ ٹی وی کے نمائندے نے واضح کیا ہے کہ اسرائیلی فوج کی جانب سے لبنانی سرحدوں میں داخلے کے بعد لڑائی لبنانی سرحدوں میں لڑی جا رہی ہے۔ دوسری جانب لبنانی فوج کمانڈ کے ایک بیان میں متعدد اسرائیلی فوجیوں کی ہلاکتوں کا دعوی کیا گیا ہے۔لبنانی فوج نے اپنے بیان میں کہا ہے کہ ’’دشمن اسرائیل نے عدیسہ کے علاقے سے لبنان اور فلسطین کی تکنیکی سرحد سے تجاوز کیا، اقوام متحدہ کی عبوری فورسز کی جانب سے روکے جانے کے باوجود دشمن اسرائیلی فوج نے لبنانی سرحدیں پار کیں، جس پر لبنانی فوج نے انفرادی اسلحے، آر پی جی شیلوں سے اسرائیلی فوج کا راستہ روکا، ان جھڑپوں میں دشمن فورسز نے بڑے پیمانے پر اسلحہ، مشین گنیں اور ٹینک استعمال کیے، حملے میں لبنانی فوجی اور شہریوں کے گھروں کو نشانہ بنایا گیا، بیان میں کہا گیا کہ صورتحال اب تک خطرناک ہے، اقوام متحدہ کی عبوری دورانیے کی فوج نے حالات معمول پر لانے کے لیے رابطے قائم کرنا شروع کر دیے ہیں تاہم اب تک لبنانی فضاؤں میں اسرائیلی ہیلی کاپٹر گردش کر رہے ہیں۔ نیوز ایجنسی ’’فرانس پریس‘‘ کے نمائندے نے بتایا کہ اسرائیلی فوج نے عدیسہ گاؤں میں لبنانی فوجی اڈے پر دس میزائل داغے ہیں، جس کے جواب میں لبنانی فوج نے بھی فائرنگ کی، اسی طرح اسرائیلی فوج نے عدیسہ کے راستے پر بھی حملے کیے، اسی طرح اسرائیلی جنگی جہازوں نے گاؤں پر کم از کم دو میزائل داغے۔ دوسری جانب لبنانی فوجی ذرائع کے مطابق جھڑپیں اس وقت شروع ہوئیں جب صہیونی فوج نے لبنانی سرزمین پر ایک درخت اکھاڑ پھینکا اور اسرائیلیوں نے فائرنگ شروع کر دی، جس پر لبنانی فوج نے بھی جوابی فائرنگ کی، ذرائع نے مزید کہا کہ لبنانی سرحدات میں بیروت سے 105 کلومیٹر دور ایک گھر پر دو صہیونی میزائل آ کر گرے۔ فرانسیسی نیوز ایجنسی کے مطابق اسرائیلی فوجیوں نے کیمرے کے سامنے رکاوٹ بننے والے ایک درخت کو اکھاڑ پھینکا تاکہ گاؤں سے آگے بھی دیکھا جا سکے۔ لبنانی شہریوں اور فوجیوں نے اسرائیلی فوج کو درخت اکھاڑنے سے روکنے کی کوشش کی جس پر اسرائیلی فوج نے لبنانی فوج پر براہ راست فائرنگ شروع کر دی جس سے باقاعدہ جھڑپ شروع ہو گئی۔ نیوز ایجنسی کے مطابق علاقے میں صورتحال انتہائی کشیدہ ہے۔ جبکہ اقوام متحدہ کی لبنان میں تعینات عبوری عرصے کے لیے تعینات فوج بھی موجود ہے۔ دوسری جانب اسرائیلی ریڈیو نے کہا ہے کہ لبنان حدود میں سے دو میزائیل مقبوضہ فلسطین پر آ کر گرے ہیں، جبکہ اقوام متحدہ کی فوج کے نمائندے نے اس موقع پر انتہائی صبر سے کام لینے کی تلقین کی ہے۔