لندن – (مرکز اطلاعات فلسطین فاؤنڈیشن) برطانیہ کے درجنوں بااثر ارکانِ پارلیمنٹ نے فلسطینی عوام سے یکجہتی کا عملی اظہار کرتے ہوئے اپنی حکومت سے مطالبہ کیا ہے کہ وہ بلا تاخیر آزاد ریاستِ فلسطین کو تسلیم کرے اور قابض اسرائیل کی جانب سے غزہ کے مظلوم عوام کو جبری طور پر بےدخل کرنے کے مذموم منصوبے کے خلاف فوری اقدام کرے۔
یہ پُرسوز مطالبہ حکمران جماعت لیبر پارٹی سے تعلق رکھنے والے لگ بھگ 60 ارکان نے برطانوی وزیر خارجہ ڈیوڈ لامی کو ایک مشترکہ خط میں پیش کیا، جس میں انہوں نے اسرائیلی ریاست کی کھلی درندگی، نسل کشی اور جبری ہجرت کے گھناؤنے منصوبوں پر شدید تشویش کا اظہار کیا ہے۔
ارکانِ پارلیمنٹ نے خط میں زور دیا کہ برطانوی حکومت فوری طور پر فلسطینی ریاست کو تسلیم کرے، تاکہ عالمی سطح پر فلسطینیوں کے دیرینہ حقِ خودارادیت کو تسلیم شدہ حیثیت حاصل ہو۔ انہوں نے خاص طور پر جنوبی غزہ کے شہر رفح میں جاری اسرائیلی جبری انخلا کے منصوبے کی شدید مذمت کرتے ہوئے مطالبہ کیا کہ برطانیہ اس ظلم کے سدباب کے لیے عملی اقدامات کرے۔
اس خط کا پس منظر قابض اسرائیلی وزیرِ جنگ یسرائیل کاٹس کے اُس اعلان سے جڑا ہے جس میں اس نے کہا تھا کہ وہ تمام فلسطینیوں کو غزہ سے جبری طور پر نکال کر رفح کے مقام پر ایک کیمپ میں بند کرنا چاہتا ہے اور بعد ازاں انہیں مکمل طور پر غزہ سے بےدخل کر دیا جائے گا۔
ارکانِ پارلیمنٹ نے واضح کیا کہ یسرائیل کاٹس کے ان بیانات سے یہ بات عیاں ہو چکی ہے کہ غزہ کو نسلی صفائی کا نشانہ بنانے، یعنی مکمل طور پر فلسطینیوں سے خالی کرنے کی منصوبہ بندی کی جا رہی ہے، جو انسانیت کے خلاف کھلی جارحیت ہے۔
خط میں اسرائیلی انسانی حقوق کے ممتاز وکیل مائیکل سفارد کے بیان کا بھی حوالہ دیا گیا، جنہوں نے اس اسرائیلی منصوبے کو “انسانیت کے خلاف جرائم کی ایک منظم کارروائی” قرار دیا۔ انہوں نے واضح کیا کہ اس منصوبے کا مقصد غزہ کے باشندوں کو زبردستی جنوبی سرحد پر منتقل کرنا اور پھر انہیں ہمیشہ کے لیے فلسطین سے بےدخل کرنا ہے۔
یہ خط ایک ایسے وقت میں سامنے آیا ہے جب غزہ کے عوام مسلسل 9 ماہ سے قابض اسرائیل کی وحشیانہ بمباری، اجتماعی قتلِ عام، ہسپتالوں، اسکولوں اور پناہ گاہوں کی تباہی اور بچوں سمیت ہزاروں بےگناہ انسانوں کی شہادت کا سامنا کر رہے ہیں۔
فلسطینی عوام اس وقت تاریخ کے بدترین انسانی المیے سے گزر رہے ہیں اور عالمی برادری کی خاموشی اس ظلم میں برابر کی شریک بنتی جا رہی ہے۔ ایسے میں برطانوی ارکانِ پارلیمنٹ کی یہ پکار ایک امید کی کرن ہے، جو مظلوم فلسطینیوں کے حق میں عالمی ضمیر کو جھنجھوڑنے کی ایک بھرپور کوشش ہے۔
