غزہ ۔ (مرکز اطلاعات فلسطین فاؤنڈیشن ) اسلامی تحریک مزاحمت ’حماس‘ نے اقوام متحدہ میں قابض اسرائیل کی رکنیت معطل کرنے اور اس پر پابندیاں عائد کرنے کے ملائیشیا کے مطالبے کا خیر مقدم کیا ہے۔
حماس نے اپنے بیان میں عرب و اسلامی ممالک اور دنیا کی آزاد اقوام پر زور دیا کہ وہ اس مطالبے کو اپنائیں اور اقوام متحدہ میں تمام ذرائع استعمال کرتے ہوئے اس مجرمانہ صہیونی ریاست کی رکنیت معطل کرنے اور اس پر پابندیاں عائد کرنے کے لیے عملی اقدامات کریں تاکہ وہ فلسطینی عوام کے خلاف جاری نسل کشی اور فاقہ کشی کے جرائم کو روکا جا سکے۔
عالمی میڈیا کے مطابق ملائیشیا نے جمعہ کے روز ایک مرتبہ پھر عالمی برادری سے مطالبہ کیا کہ قابض اسرائیل کی اقوام متحدہ میں رکنیت معطل کی جائے اور اس پر پابندیاں عائد کی جائیں۔
ملائیشیا کے وزیر خارجہ محمد حسن نے ایک پریس بریفنگ کے دوران کہا کہ “ملائیشیا نے گزشتہ سال اقوام متحدہ کی جنرل اسمبلی میں یہ معاملہ اٹھایا تھا اور آئندہ اجلاس میں بھی اس مطالبے کو دہرایا جائے گا۔”
انہوں نے مزید کہا، “اب وقت آگیا ہے کہ قابض اسرائیل کی رکنیت معطل کی جائے اور تمام ممالک اس پر پابندیاں عائد کریں۔”
ان کا کہنا تھا کہ قابض اسرائیل پر پابندیاں عائد کرنے کا مطلب اس کی جانب اسلحے کی ترسیل کو روکنا ہے۔ حسن نے اس جانب بھی توجہ دلائی کہ عالمی برادری کی اکثریت قابض اسرائیل کو غزہ کی پٹی پر قبضہ کرنے اور اسے تباہ کرنے کے منصوبے پر عمل درآمد سے روکنے کا واضح مطالبہ کر چکی ہے۔
