پاکستان فلسطین تحقیقاتی مرکز کا قیام عمل میں لایا جائے گا۔

کراچی (مرکزاطلاعات فلسطین فاؤنڈیشن)مسئلہ فلسطین کو جامعات اور بین الاقوامی اداروں سمیت پاکستان کے اعلی سطحی پالیسی ساز اداروں تک آگہی فراہم کرنے کے لئے پاکستان فلسطین تحقیقاتی مرکز (پاکستان فلسطین ریسرچ سنٹر)کا قیام عمل میں لایا جا ئے گا۔

ان خیالات کا اظہار فلسطین فائونڈیشن پاکستان کے سیکرٹری جنرل ڈاکٹر صابر ابو مریم نے دفتر سے جاری ایک بیان میں کیا۔ انہوںنے کہا کہ تحقیقاتی مرکز (پی پی آر سی)کا مقصد بین الاقوامی سطح اور پاکستان کے پالیسی ساز اداروں تک مسئلہ فلسطین اور خطے کی صورتحال سے متعلق تحقیقیات کے ذریعہ مسائل کواجاگر کرنا اور مسئلہ فلسطین کے منصفانہ حل کے لئے کوششوں کو جاری رکھنا ہے۔

واضح رہے کہ جمعرات کے روز فلسطین فائونڈیشن پاکستان کے مرکزی دفتر میں پاکستان فلسطین تحقیقاتی مرکز کا پہلا اجلاس ہوا جس میں معروف اسکالر اور دانشورماہر سیاسیات و انسانی حقوق ڈاکٹر خالدہ غوث، بین الاقوامی تعلقات سے تعلق رکھنے والے مختلف اساتذہ اور محققین میں ڈاکٹر سدرہ احمد، ڈاکٹر فاطمہ آغا شاہ سمیت ریسرچ اسکالرز طلال علی، محمد حسین، علی عریضی اور دیگر نے شرکت کی جبکہ ڈاکٹر طلعت وزارت، ڈاکٹر زاہد علی زاہدی سمیت محترمہ ثنا خان اور ندا علی نجی مصروفیات کے باعث اجلا س میں شریک نہ ہو سکے۔