غزہ (مرکز اطلاعات فلسطین فاؤنڈیشن ) گذشتہ شب شمالی غزہ شہر میں فلسطینی مزاحمت کار کے نشانہ باز نے قابض اسرائیلی فوجی کو موت کے گھاٹ اتار دیا۔ یہ کارروائی قابض اسرائیل کی غزہ پر مسلسل فوجی درندگی کے جواب میں کی گئی۔
قابض اسرائیلی فوج کے ترجمان نے ایک مختصر بیان میں تصدیق کی کہ شمالی غزہ میں فلسطینی مزاحمت کے ساتھ جھڑپوں کے دوران ایک اسرائیلی فوجی ہلاک ہو گیا۔
قابض اسرائیلی فوجی ریڈیو کے مطابق ہلاک ہونے والا فوجی “تشالاتشو شمعون دمالاش” رینک کے لحاظ سے سرجینٹ میجر تھا اور “لواء ناحال” کی بٹالین 932 سے تعلق رکھتا تھا۔ اسے شمالی شہر غزہ کے علاقے الشیخ رضوان کے قریب قابض اسرائیل کے ایک فوجی چوکی پر نشانہ بنایا گیا۔
تفصیلات کے مطابق بدھ کی شام تقریباً پانچ بجے فلسطینی تحریک حماس کے ایک نشانہ باز نے دور سے گولی داغی جو سیدھی اسرائیلی فوجی کو لگی اور وہ موقع پر ہی ہلاک ہو گیا۔ قابض اسرائیلی فوج نے یہ بھی تسلیم کیا کہ اس کارروائی کے دوران کوئی نزدیک آنے یا چوکی پر حملہ کرنے کی کوشش نہیں کی گئی بلکہ یہ ایک دور مار فائر تھا۔
قابض اسرائیلی فوج کے سرکاری اعداد و شمار کے مطابق سات اکتوبر سنہ2023ء سے اب تک ہلاک ہونے والے صہیونی افسران اور فوجیوں کی تعداد بڑھ کر 912 ہو گئی ہے۔
