مقبوضہ بیت المقدس (مرکزاطلاعات فلسطین فاؤنڈیشن) آج پیر کی صبح قابض اسرائیلی بلڈوزروں نےجزیرہ نما النقب کے غیر تسلیم شدہ گاؤں السرّہ پر دھاوا بول کر سولہ گھروں کو ملبے کا ڈھیر بنا دیا۔ قابض پولیس کی سیکڑوں کی نفری نے پورے علاقے کو گھیرے میں لے کر اہلِ علاقہ کو قریب تک نہ آنے دیا۔ معصوم خاندان بےبس نظروں سے اپنے آشیانوں کا انہدام دیکھتے رہے۔
علاقائی کونسل برائے غیر تسلیم شدہ دیہات کے ڈائریکٹر جنرل سلیمان الہواشلہ نے بتایا کہ یہ اقدام بئرالسبع کی عدالت کے اُس فیصلے کے بعد کیا گیا جو گذشتہ جمعرات کو جاری ہوا تھا، جس میں گاؤں کو خالی کرانے اور گھروں کو گرانے کا حکم دیا گیا۔
ہواشلہ کے مطابق آج کی کارروائی کم از کم سولہ مکانات کو نشانہ بنا رہی ہے، جب کہ کچھ مجبور خاندان پہلے ہی اپنے گھروں کو خود مسمار کر چکے تھے تا کہ بھاری جرمانوں سے بچ سکیں۔ السرّہ میں قبیلۂ عزازمہ کے پندرہ سو افراد رہتے ہیں۔ وہاں سڑک، پانی، بجلی، نکاسیٔ آب، سکول اور ہسپتال جیسی بنیادی سہولتیں تک موجود نہیں۔
ان کا کہنا تھا کہ یہ انہدام قابض اسرائیل کی اُس منظم جبری بے دخلی پالیسی کا حصہ ہے جس کا نشانہ 1948 کے مقبوضہ علاقوں، خصوصاً نقب کے فلسطینی ہیں۔ انہی لمحوں میں اسی علاقے میں نئی صہیونی کالونیوں کی منصوبہ بندی بھی جاری ہے۔
کونسل کے ذرائع نے خبردار کیا ہے کہ اگلے دو ہفتوں میں السرّہ کے مزید دو سو گھروں کے گرائے جانے کا امکان ہے۔ اس کا مطلب گاؤں کا مکمل صفایا اور اہلِ بستی کی جڑ سے اکھاڑ پھینکنے کی کھلی دھمکی ہے۔
