مقبوضہ بیت المقدس (مرکزاطلاعات فلسطین فاؤنڈیشن) قابض اسرائیلی فوج کی طرف سے فلسطینی نمازیوں کی مسجد اقصیٰ میں داخلے اور وہاں پر عبادت پر عائد غیر انسانی پابندیوں کے باجود گذشتہ شام لیلۃ القدر کے موقعے پر دو لاکھ کے قریب فلسطینیوں نے مسجد اقصیٰ میں عشاء اور تراویح کی نماز ادا کی۔
بدھ کی شام ایک لاکھ 80 ہزار فلسطینیوں نے اسرائیلی قابض حکام کی طرف سے عائد پابندیوں کے باوجود بابرکت مسجد الاقصیٰ میں عشاء اور نماز تراویح ادا کی۔
القدس میں اسلامی اوقاف کے محکمے نے کہا کہ “قابض حکام کی طرف سے مسلط کی گئی پابندیوں کے باوجود باوجود ہزاروں فلسطینیوں نے مسجد اقصیٰ کے اندر عشا اور تراویح کی نماز ادا کی”۔ محکمہ اوقاف کا کہنا ہےکہ صہیونی فوج کی بھاری نفری نے مسجد اقصیٰ کی طرف آنے والے راستوں کو گھیرے میں لے رکھا تھا۔ قابض فوج نے فلسطینی نمازیوں کو جگہ جگہ روک کر ان کی شناخت پریڈ کی۔
قابض فوج نے متعدد نوجوانوں کو مسجد اقصیٰ میں نماز ادا کرنے کے لیے داخل ہونے سے روک دیا جب کہ مسلسل مسجد اقصیٰ اور اس کے اطراف میں پابندیاں سخت کی گئی ہیں۔ قابض فوج کی طرف سے مقبوضہ بیت المقدس، غرب اردن سے آنے والے فلسطینیوں اور مقبوضہ شمالی فلسطین کے فلسطینی مسلمانوں کو بھی قبلہ اول تک رسائی سے روک رکھا ہے۔ اس کے باوجود پابندیاں توڑ کر فلسطینی قبلہ اول میں پہنچنے میں کامیاب ہو رہے ہیں۔
