غزہ (مرکز اطلاعات فلسطین فاؤنڈیشن ) اسلامی مزاحمتی تحریک حماس کے ترجمان حازم قاسم نے اس بات کی تصدیق کی کہ حماس جنگ بندی اور اسیران کے تبادلے سے متعلق معاہدے کے پہلے مرحلے کی تکمیل کے لیے مکمل طور پر پُرعزم ہے۔ انہوں نے کہا کہ جماعت قابض اسرائیل کے اسیران کی لاشیں جلد از جلد حوالے کرنے کی پوری کوشش کر رہی ہے۔
حازم قاسم نے بتایا کہ حماس اب تک قابض اسرائیل کے 18 قیدیوں کی لاشیں حوالے کر چکی ہے۔ تاہم انہوں نے وضاحت کی کہ قابض اسرائیل کی غزہ پر جارحیت سے ہونے والی وسیع تباہی اور لاجسٹک سہولیات کی شدید کمی باقی لاشوں کو ملبے تلے سے نکالنے کی راہ میں بڑی رکاوٹ ہے۔
انہوں نے کہا کہ غزہ کے عوام کو یہ حق حاصل ہے کہ وہ وہ مشینری اور آلات اندر لا سکیں جو تقریباً دس ہزار شہداء کی لاشیں نکالنے کے لیے درکار ہیں۔ انہوں نے قابض اسرائیل کی جانب سے ان انسانی بنیادوں پر ضروری آلات کے داخلے کی ممانعت کو سخت تنقید کا نشانہ بنایا۔
حازم قاسم نے قابض اسرائیل کے اس جھوٹے دعوے کو بھی مسترد کیا کہ “حماس کو لاشوں کے مقامات کا علم ہے”۔ انہوں نے واضح کیا کہ یہ بے بنیاد الزامات ہیں جن کا مقصد عالمی رائے عامہ کو گمراہ کرنا ہے، کیونکہ اسرائیلی بمباری نے پورے غزہ کے نقشے ہی بدل دیے ہیں اور لاشوں کے ٹھکانے تلاش کرنا انتہائی مشکل بن گیا ہے۔
انہوں نے کہا کہ حماس معاہدے کی تمام شقوں پر پوری ذمہ داری کے ساتھ عمل کر رہی ہے تاکہ قابض اسرائیل کو اپنے وعدوں سے انحراف کرنے کا کوئی جواز نہ مل سکے۔ یہ معاہدہ امریکہ، قطر، مصر اور ترکیہ کی ثالثی سے طے پایا تھا۔
واضح رہے کہ معاہدے کا پہلا مرحلہ رواں ماہ کی دس تاریخ کو نافذ ہوا تھا۔ اس کے تحت حماس نے 20 اسرائیلی اسیران کو زندہ حالت میں رہا کیا جبکہ 16 کی لاشیں حوالے کی گئیں، اور 12 مزید اسیران اگلی کھیپ میں شامل ہیں۔
یہ معاہدہ اس خونی جنگ کے خاتمے کا باعث بنا جو قابض اسرائیل نے غزہ پر سات اکتوبر سنہ2023ء سے مسلط کر رکھی تھی۔ اس جنگ میں اب تک 68 ہزار 159 فلسطینی شہید اور 1 لاکھ 70 ہزار سے زائد زخمی ہو چکے ہیں، جن میں زیادہ تر عورتیں اور بچے شامل ہیں۔ قابض اسرائیل کی درندگی نے غزہ کی 90 فیصد شہری تنصیبات کو ملبے کے ڈھیر میں تبدیل کر دیا ہے۔
