رام اللہ –(مرکز اطلاعات فلسطین فاؤنڈیشن ) وزارت اوقاف و مذہبی امور نے انکشاف کیا ہے کہ جولائی کے مہینے میں قابض صہیونی ریاست کے انتہاپسندوں نے 27 بار مسجد اقصیٰ پر دھاوا بولا اور حرم ابراہیمی میں اذان دینے پر 51 مرتبہ پابندی لگائی گئی۔
ماہانہ رپورٹ میں بتایا گیا ہے کہ قابض اسرائیل کے متعصب وزیر برائے قومی سکیورٹی ایتمار بن گویر نے سرکاری طور پر پولیس کو ہدایات دی ہیں کہ یہودی آبادکار مسجد اقصیٰ کے صرف مشرقی حصے میں نہیں بلکہ پورے صحن میں گانا بجانا اور رقص کر سکتے ہیں۔
وزارت اوقاف نے مزید بتایا کہ ان آبادکاروں نے قابض اسرائیل کی پولیس کی سخت حفاظت میں بلند آواز میں تلمودی گیت گائے اور یہودی مذہبی رسومات ادا کیں، جو مسجد کی حرمت اور اسلامی تقدس کی صریح خلاف ورزی ہے۔
ایک صہیونی میوزیکل بینڈ نے مسجد اقصیٰ کے اندر باب الرحمت کے قریب ایک صہیونی گیت “اگر میں تمہیں بھول جاؤں اے یروشلم” گایا، جو جعلی ہیکل کے قیام کی کھلی دعوت ہے۔ یہودیوں کی جانب سے مسجد اقصیٰ کو “ہیکل” بنانے کی کوششیں اب سرعام شدت اختیار کر چکی ہیں۔
الخلیل میں حرم ابراہیمی میں اذان کی ادائیگی 51 مرتبہ روکی گئی۔ قابض فوج نے موذن کے داخلے کو جان بوجھ کر تاخیر کا شکار بنایا اور مشرقی دروازے و کھڑکیاں مسلسل آٹھ ماہ سے بند رکھی گئی ہیں۔
وزارت اوقاف کے مطابق یہ تمام اقدامات قابض اسرائیل کی منظم صہیونی پالیسی کا حصہ ہیں جس کا مقصد فلسطینی شناخت کو مٹانا اور مقبوضہ علاقوں پر اپنی بالادستی قائم کرنا ہے۔
وزارت نے عالمی برادری، انسانی حقوق کی تنظیموں اور اسلامی دنیا سے مطالبہ کیا ہے کہ وہ فوری مداخلت کر کے مسجد اقصیٰ اور حرم ابراہیمی جیسے مقدس مقامات کا تحفظ یقینی بنائیں۔ ساتھ ہی فلسطینی عوام سے روزانہ کی بنیاد پر قبلہ اول اور حرم ابراہیمی میں موجودگی اور نماز کی ادائیگی کا سلسلہ جاری رکھنے کی اپیل کی گئی ہے۔
یہ رپورٹ اُس وقت منظرعام پر آئی ہے جب ایتمار بن گویر کی سرکردگی میں بڑے پیمانے پر مسجد اقصیٰ پر حملے کیے گئے۔ یہ واقعات ان کے مخصوص دن “خراب ہیکل” کی یاد میں انجام دیے گئے، جسے یہودی دو سابقہ معبدوں کے انہدام پر یوم سوگ کے طور پر مناتے ہیں۔
مقدسی ذرائع کے مطابق صرف ایک صبح کے وقت 3023 صہیونی آبادکاروں نے مسجد اقصیٰ پر دھاوا بولا جن میں کئی وزراء اور کنیسٹ ارکان شامل تھے۔ اس دوران مسجد کے تمام دروازے فلسطینی نمازیوں کے لیے بند کر دیے گئے تاکہ آبادکاروں کی حرکات کو تحفظ دیا جا سکے۔
دستیاب ویڈیوز میں ان صہیونیوں کی جانب سے “برکت کاہن” کی مذہبی رسم مسجد اقصیٰ کے مختلف حصوں میں ادا کرتے دکھایا گیا، حالانکہ پہلے یہ صرف مشرقی حصے تک محدود تھی۔
