مقبوضہ بیت المقدس (مرکزاطلاعات فلسطین فاوؑنڈیشن) اسلامی تحریک مزاحمت ’حماس‘ نے حزب اللہ کے سینیر رہنما طالب سمیر عبداللہ کی اسرائیلی فوج کی طرف سے کی گئی کارروائی میں شہادت پر انہیں عقیدت پیش کرتے ہوئے ان کے لواحقین اور حزب اللہ سے تعزیت کی ہے۔
حماس نے بدھ کے روز ایک بیان میں کہا کہ خدا پر پورے یقین، تسلیم و رضا اور ایمان کے ساتھ ہم بہادر شہید حزب اللہ میں اسلامی مزاحمت کے سینیر رہ نما طالب سمیر عبداللہ کی شہادت پر انہیں خراج عقیدت پیش کرتے ہیں۔
انہوں نے کہا کہ وہ طوفان الاقصیٰ میں ہمارے فلسطینی عوام کی جنگ میں دفاع، حمایت اور بہادری سے حصہ لینے اور صہیونی دشمن پر کاری ضرب لگانے اور جنوبی لبنان اور شمالی مقبوضہ فلسطین میں دشمن کے مضبوط ٹھکانوں کو تباہ کرنے میں مصروف رہے اور آخر وقت تک جہاد اور مزاحمت کا راستہ اختیار کیا۔
خیال رہے کہ بدھ کی شام اسرائیل نے حزب اللہ کے رہ نما طالب سمیر عبداللہ “ابو طالب” سمیت حزب اللہ کے چار ارکان کو ایک فضائی حملے میں شہید کردیا تھا۔
حماس نے مزید کہا کہ ہم عظیم مجاہد رہ نما شہید طالب سمیر عبداللہ کی شہادت پر اس دکھ میں برابر کے شریک ہیں۔ ان کی شہادت بیت المقدس اور مسجد اقصیٰ کو آزاد کرانے کے راستے میں اپنی جانوں کا نذرانہ پیش کرنے والوں میں شامل ہے۔
