غزہ (مرکز اطلاعات فلسطین فاؤنڈیشن ) اسلامی تحریک مزاحمت ’حماس‘ کے عسکری ونگ عزالدین القسام شہید بریگیڈز نے اعلان کیا ہےکہ اس کے مجاہدین نے جنوبی غزہ میں قابض اسرائیلی فوج کے متعدد اہداف پر کارروائیاں کیں اور ایک صہیونی فوجی کو گرفتار کرنے کی کوشش بھی کی۔
القسام بریگیڈز نے اپنے بیان میں بتایا کہ بدھ کی دوپہر اس کے مجاہدین نے غزہ کے جنوبی علاقے تل الہوا کے جنوب میں واقع نیتساریم محور میں دشمن کے فوجی ٹھکانے الاحواض پر حملہ کیا۔
بیان کے مطابق مجاہدین نے انتہائی قریب سے قابض اسرائیلی فوج کے سپاہیوں سے براہِ راست جھڑپ کی جس کے نتیجے میں متعدد دشمن فوجی ہلاک اور زخمی ہوئے۔
القسام بریگیڈز نے مزید کہا کہ اس کے مجاہدین نے دو صہیونی ٹینکوں کو نشانہ بنایا، ایک پر “یاسین 105” اور دوسرے پر “تینڈم” قسم کے راکٹ داغے گئے، جن سے ٹینکوں کو شدید نقصان پہنچا۔
بیان میں کہا گیا کہ القسام کے مجاہدین نے ایک قابض فوجی کو گرفتار کرنے کی کوشش کی مگر زمینی حالات اس کی اجازت نہ دے سکے۔
القسام بریگیڈز کے مطابق اس کارروائی کے دوران اسرائیلی فضائیہ کے ہیلی کاپٹروں کو ہلاک شدہ اور زخمی فوجیوں کو نکالنے کے لیے اترتے ہوئے دیکھا گیا اور یہ عمل ایک گھنٹے سے زائد تک جاری رہا۔
واضح رہے کہ قابض اسرائیل کی جانب سے غزہ کے خلاف نسل کش جنگ کے آغاز، یعنی 7 اکتوبر سنہ2023ء سے فلسطینی مزاحمتی دھڑے مسلسل قابض فوج کے خلاف مختلف محاذوں پر ڈٹے ہوئے ہیں، اور روزانہ کی بنیاد پر دشمن فوج کو بھاری جانی و عسکری نقصان پہنچا رہے ہیں۔
