بیروت – (مرکز اطلاعات فلسطین فاؤنڈیشن ) لبنانی اسلامی مزاحمتی تنظیم حزب اللہ نے قابض اسرائیل کے شام پر تازہ حملے کی شدید الفاظ میں مذمت کرتے ہوئے اسے شام کی خودمختاری پر کھلا حملہ اور بین الاقوامی قوانین کی صریح خلاف ورزی قرار دیا ہے۔ بیان میں کہا گیا ہے کہ یہ حملہ بے گناہ شہریوں کو نشانہ بنانے اور خطے میں انتشار پھیلانے کی خطرناک سازش کا تسلسل ہے۔
مرکز اطلاعات فلسطین کو موصول ہونے والے بیان میں حزب اللہ نے کہا کہ دمشق پر کیا گیا یہ حملہ نہ صرف شام کی حاکمیت کے خلاف سنگین جارحیت ہے، بلکہ یہ انسانی اقدار اور عالمی ضوابط کی بھی کھلم کھلا توہین ہے۔ یہ دشمن کی اُن خطرناک چالوں کا حصہ ہے جن کا مقصد خطے کے ممالک کو غیر مستحکم کرنا اور امت کو اندرونی خلفشار میں مبتلا کر دینا ہے۔
حزب اللہ نے اپنے بیان میں زور دیا کہ شام کے داخلی مسائل کا حل صرف قومی مفاہمت، مکالمے اور اتحاد کے ذریعے ممکن ہے۔ انہوں نے شامی عوام سے اپیل کی کہ وہ دشمن کی سازشوں کے مقابلے کے لیے متحد ہو جائیں، اور اپنی سرزمین و خودمختاری کے تحفظ کے لیے یکجا ہو کر میدان میں آئیں۔
بیان میں مزید کہا گیا کہ قابض اسرائیل ایک وحشی دشمن ہے، جو جب بھی موقع پاتا ہے، خون بہانے سے دریغ نہیں کرتا۔ حزب اللہ نے عرب و اسلامی دنیا کے عوام سے مطالبہ کیا کہ وہ صہیونی دشمن کے اس خطرناک ایجنڈے کے خلاف ہوشیار رہیں، جو پورے خطے کو اپنی ہوسِ تسلط کا شکار بنانے پر تُلا ہوا ہے۔
آج بدھ کے روز قابض اسرائیلی فوج نے دارالحکومت دمشق میں شامی جنرل اسٹاف کے ہیڈکوارٹر، وزارت دفاع کے دفاتر اور قصر الشعب کے اردگرد شدید بمباری کی، جس کے نتیجے میں کم از کم تین افراد شہید اور چونتیس زخمی ہو گئے، جیسا کہ شام کی وزارتِ صحت نے تصدیق کی ہے۔
یہ حملہ نہ صرف شامی عوام کے خلاف درندگی کا مظہر ہے، بلکہ یہ پوری انسانیت کے ضمیر پر بھی ایک سنگین ضرب ہے، جو برسوں سے اس ظلم پر خاموش تماشائی بنی ہوئی ہے۔ آج دمشق میں بہتا ہوا خون، غزہ کی خاک و خون میں لپٹی لاشوں سے جڑا ہوا ہے، اور دونوں ایک ہی پیغام دے رہے ہیں:
“اے امت مسلمہ، جاگ! اور ظالم کے خلاف اٹھ کھڑی ہو!”
