نیو یارک – (مرکز اطلاعات فلسطین فاؤنڈیشن ) اقوام متحدہ کے سیکرٹری جنرل انتونیو گوتیریس نے غزہ شہر میں قابض اسرائیل کی فوجی کارروائیوں میں توسیع کے “تباہ کن نتائج” اور اس کے نتیجے میں ہزاروں تھکے ہارے اور صدمہ زدہ شہریوں کے دوبارہ بے گھر ہونے پر شدید انتباہ جاری کیا ہے۔
جمعرات کو سلامتی کونسل کے اجلاس میں شرکت سے قبل صحافیوں سے گفتگو کرتے ہوئے گوتیریس نے کہا: “غزہ میں شہری ایک بار پھر ایک اور مہلک کشیدگی کا سامنا کر رہے ہیں۔”
انہوں نے مزید کہا کہ قابض اسرائیل کی جانب سے غزہ شہر پر مکمل فوجی کنٹرول حاصل کرنے کے ابتدائی اقدامات ایک نئے اور خطرناک مرحلے کی نشاندہی کرتے ہیں۔
اقوام متحدہ کے سربراہ نے زور دیتے ہوئے کہا کہ: “غزہ میں موت اور تباہی کی سطح کی حالیہ تاریخ میں کوئی مثال نہیں ملتی۔”
انہوں نے یہ بھی کہا کہ جنگ میں شہریوں کو بھوک کا شکار کرنا بطور ہتھیار استعمال نہیں کیا جانا چاہیے، اور شہریوں کے تحفظ کے ساتھ ساتھ انسانی امداد کی فوری اور بلا روک ٹوک رسائی یقینی بنائی جانی چاہیے۔
گوتیریس نے واضح الفاظ میں کہا: “مزید بہانوں، رکاوٹوں اور جھوٹ کے لیے کوئی جگہ نہیں ہے۔”
انہوں نے غزہ کے جنوبی شہر خان یونس میں ناصر ہسپتال پر اسرائیلی بمباری کا ذکر کیا، جس میں 5 صحافیوں سمیت 21 فلسطینی شہید ہوئے۔ ان کا کہنا تھا کہ: “ایک کے بعد دوسرا حملہ شہریوں کو مار رہا ہے، جن میں طبی کارکن اور صحافی بھی شامل ہیں جو صرف اپنا بنیادی فریضہ انجام دے رہے ہیں، اور یہ سب کچھ دنیا کی آنکھوں کے سامنے ہو رہا ہے۔”
سیکرٹری جنرل نے مزید کہا کہ یہ حملے مظالم کی ایک نہ ختم ہونے والی فہرست کا حصہ ہیں۔ انہوں نے زور دیا کہ فلسطینیوں کے خلاف نسل کشی اور مظالم کے ذمہ داروں کو انصاف کے کٹہرے میں لایا جانا چاہیے۔
