اریحا – (مرکز اطلاعات فلسطین فاؤنڈیشن ) قابض اسرائیل کے وحشی صہیونی آبادکاروں نے جمعہ کے روز مقبوضہ مغربی کنارے کے شہر اریحا کے شمال میں واقع شلال العوجا کے علاقے میں دو بے گناہ فلسطینی خاندانوں کو زبردستی گھروں سے بے دخل کر دیا۔
البدیر آرگنائزیشن برائے دفاعِ حقوقِ بدو اور نشانہ بنائی گئی دیہی آبادیوں کے سربراہ حسن ملیحات نے بتایا کہ صہیونی دہشت گرد گروہوں نے عايد موسیٰ کعابنہ اور ابراہیم عايد کعابنہ کے خاندانوں کو وحشیانہ حملوں کے بعد جبراً علاقہ چھوڑنے پر مجبور کیا۔
ان کا کہنا تھا کہ یہ حملے انتہائی درندگی پر مبنی تھے، آبادکاروں نے دونوں خاندانوں کو گھیر کر نہ صرف شدید تشدد کا نشانہ بنایا بلکہ انہیں براہِ راست قتل کی دھمکیاں دیں، جو ملیحات کے مطابق “بدترین صہیونی دہشت گردی” کی مثال ہے۔
ملیحات نے مزید بتایا کہ صہیونی آبادکاروں نے حال ہی میں ان فلسطینی گھروں سے محض 300 میٹر کے فاصلے پر غیر قانونی چوکی نما بستی قائم کی ہے، جس کے بعد ان خاندانوں کی زندگی اجیرن بنا دی گئی۔ روزانہ کی بنیاد پر ہونے والی صہیونی یلغار، املاک کی تباہی، خوف پھیلانے کی منظم کارروائیاں اور بار بار گھر میں گھسنے کے واقعات اس قدر بڑھ گئے کہ انہیں اپنے ہی گھروں سے نکلنے پر مجبور ہونا پڑا۔
