غزہ (مرکزاطلاعات فلسطین فاوؑنڈیشن) اسرائیلی جیلوں اور حراستی مراکز سے رہائی پانے والے غزہ کے فلسطینی اسیران کی 100 شہادتوں کی بنیاد پر یورو میڈ ہیومن رائٹس نے غزہ کے اسیران کے ساتھ تشدد اور غیر انسانی اور توہین آمیز سلوک کی 42 اقسام کی نشاندہی کی ہے۔ یہ ہتھکنڈے صہیونی جلادوں کی طرف سے نہتے فلسطینیوں کی گرفتاری کےبعد انہیں اذیتیں دینے کے استعمال کیے جاتے ہیں۔
یورو میڈ نے اس بات پر روشنی ڈالی کہ فلسطینی اسیران کو متعلقہ بین الاقوامی قوانین کی خلاف ورزی کرتے ہوئے عدالتی حکام یا کسی بھی قانونی طریقہ کار کے سامنے لائے بغیر حراست میں رکھا گیا اور حراست میں توسیع دی گئی۔
انہیں اسرائیلی فوجی اڈوں اور حراستی مراکز میں حراست میں رکھا گیا اور ان پر تشدد کیا گیا۔ خفیہ اور غیر سرکاری حراستی مراکز خاص طور پر وہ فلسطینی جنہیں غزہ کی پٹی کی سرحد کے قریب رکھا گیا۔ انہیں بدترین اذیتوں کا سامنا ہے۔
رپورٹ میں فلسطینی قیدیوں کے ساتھ روا رکھے جانے والے تشدد اور ظالمانہ، ذلت آمیز اور غیر انسانی سلوک پر روشنی ڈالی گئی، جن میں مردوں اور عورتوں کو زبردستی اور بار بار برہنہ کرنا، بار بار برہنہ کرکے انہیں مارنا، طویل عرصے تک ہاتھ اور ٹانگیں باندھ کر رکھنا، آنکھوں پر پٹی باندھنا، سوچے سمجھے انداز میں قیدیوں کو قتل کرنا، تشدد کے تحت قتل کرنا پرتشدد مار پیٹ میں ہڈیاں توڑنا، بجلی کے کرنٹ لگانا، کھانے اور پانی سے محروم ہونا۔ نیند سے محروم کرنا اور کئی دوسرے حربے شامل ہیں۔
