غزہ – (مرکز اطلاعات فلسطین فاؤنڈیشن) اقوام متحدہ کی فلسطینی پناہ گزینوں کے امور کی نگران ایجنسی ’اونروا‘ نے غزہ میں صحت کے ایک نئے اور خطرناک بحران سے خبردار کیا ہے۔ ہفتے کے روز جاری بیان میں اونروا نے کہا ہے کہ غزہ میں صاف پانی اور صابن کی عدم دستیابی، پناہ گاہوں میں انسانوں کا ہجوم اور شدید گرمی — یہ سب ایسے مہلک عوامل ہیں جو آنے والے دنوں میں غزہ کے نہتے شہریوں کو مزید المناک سانحات سے دوچار کر سکتے ہیں۔
اونروا نے سوشل میڈیا پلیٹ فارم “ایکس” پر جاری بیان میں مطالبہ کیا کہ قابض اسرائیل کی طرف سے مسلط کردہ محاصرہ فوری طور پر ختم کیا جائے تاکہ انسانی امداد کی ترسیل دوبارہ شروع ہو سکے، بالخصوص صفائی ستھرائی کی اشیاء کی فراہمی یقینی بنائی جا سکے۔
ایجنسی نے بتایا کہ فلسطینی بچوں کو نہانے کے لیے صاف پانی میسر نہیں، جبکہ صابن جیسی بنیادی چیز ان کے لیے ایک خواب بن چکی ہے۔ یہ صورتِ حال نہ صرف ان کے جسمانی بلکہ ذہنی اور جذباتی وجود کے لیے بھی تباہ کن ہے۔
اونروا نے زور دے کر کہا کہ پناہ گاہوں میں ضرورت سے زیادہ بھیڑ اور غزہ کی شدید گرمی مل کر ایسے سنگین طبی نتائج پیدا کر سکتی ہے جو انسانی بحران کو ناقابلِ قابو بنا دیں گے۔
غزہ میں پہلے ہی نظامِ صحت مکمل طور پر تباہ ہو چکا ہے۔ قابض اسرائیل کی دانستہ بمباری اور حملوں نے فعال ہسپتالوں اور طبی مراکز کو خاکستر کر دیا ہے۔ ساتھ ہی، قابض فوج نے طبی سامان، ادویات اور جدید طبی مشینری کی آمد پر بھی سخت پابندیاں عائد کر رکھی ہیں۔
یہ سب کچھ ایک منظم نسل کشی کا حصہ ہے۔ 7 اکتوبر 2023ء سے شروع ہونے والی اس خونی مہم میں قابض اسرائیل، امریکہ کی پشت پناہی سے، پورے غزہ کو مقتل بنا چکا ہے۔ قتل، بھوک، بمباری اور جبری بے دخلی — سبھی ایک ہی خونی خاکے کے اجزاء ہیں۔
اس ہولناک نسل کشی کے نتیجے میں اب تک ایک لاکھ 95 ہزار سے زائد فلسطینی شہید یا زخمی ہو چکے ہیں، جن میں اکثریت معصوم بچوں اور خواتین کی ہے۔ دس ہزار سے زیادہ فلسطینی لاپتہ ہیں، جبکہ لاکھوں افراد بے گھر ہو چکے ہیں۔ قحط اور بھوک نے بھی درجنوں بچوں کی جانیں لے لی ہیں۔
