بیروت(مرکز اطلاعات فلسطین فاؤنڈیشن ) قابض اسرائیلی افواج نے جنوبی لبنان کے دو علاقوں پر بمباری کی ہےجس کے نتیجے میں تین لبنانی شہری زخمی ہو گئے۔ یہ حملہ اس وقت کیا گیا جب حزب اللہ اور قابض اسرائیل کے درمیان فائر بندی کا معاہدہ تاحال برقرار ہے۔ اگرچہ دشمن ریاست کی جانب سے اس کی خلاف ورزیاں مسلسل جاری ہیں۔
لبنانی سرکاری خبر رساں ایجنسی کے مطابق ایک دشمن ڈرون نے جنوبی لبنان کے علاقے وادی جِیلو کے راستے پر الخزامی کے داخلی راستے پر ایک موٹر سائیکل کو نشانہ بنایا۔ اس حملے میں ایک شہری شدید زخمی ہوا جسے انسانی خدمت انجام دینے والی تنظیم ’’جمعیہ الرسالہ‘‘ کی ایمبولینس نے انتہائی نازک حالت میں ہسپتال منتقل کیا۔
اس سے قبل منگل کے روز ہی ایجنسی نے بتایا کہ قابض اسرائیلی ڈرون نے بنت جبیل کے علاقے میں واقع دو قصبوں، تبنین اور حاریص، کے درمیان بمباری کی جس کے نتیجے میں دو شہری زخمی ہوئے۔
زخمیوں کو تبنین سرکاری ہسپتال منتقل کیا گیا جہاں ان کی حالت کو مستحکم قرار دیا گیا۔ مزید تفصیلات فوری طور پر فراہم نہیں کی گئیں۔
منگل کی صبح قابض اسرائیلی فوج کی بکتر بند گاڑیاں جنوبی لبنان کے صوبہ النبطیہ کے ضلع بنت جبیل میں داخل ہوئیں، جبکہ اس سے قبل علاقے میں دشمن کے ڈرون طیاروں کی پروازیں غیر معمولی شدت کے ساتھ جاری رہیں۔
یاد رہے کہ اکتوبر سنہ2023ء میں قابض اسرائیل نے لبنان پر حملہ شروع کیا تھا جو ستمبر سنہ2024ء میں ایک ہمہ گیر جنگ میں تبدیل ہو گیا۔ اس خونریز جنگ میں چار ہزار سے زائد لبنانی شہری شہید اور سترہ ہزار سے زیادہ زخمی ہوئے جبکہ انیس افراد کو گرفتار کر لیا گیا۔
نومبر سنہ2024ء میں حزب اللہ اور قابض اسرائیل کے درمیان جنگ بندی کا معاہدہ طے پایا، تاہم دشمن ریاست نے اس معاہدے کی اب تک چار ہزار پانچ سو سے زائد بار خلاف ورزی کی ہے جس کے نتیجے میں سیکڑوں لبنانی شہری شہید اور زخمی ہو چکے ہیں۔ قابض اسرائیل تاحال جنوبی لبنان کی پانچ پہاڑیوں پر قابض ہے جنہیں اس نے گذشتہ جنگ کے دوران زیر تسلط لیا تھا، اس کے علاوہ وہ کئی دیگر لبنانی علاقے بھی عشروں سے غصب کیے ہوئے ہے۔
