لسبون – (مرکز اطلاعات فلسطین فاؤنڈیشن ) پرتگال میں فلسطینی عوام اور ان کے جائز نصب العین کے حق میں یکجہتی کی سرگرمیاں اور عوامی اقدامات مسلسل جاری ہیں۔ جمعرات کو ملک کے مختلف شہروں میں سول سوسائٹی کی تنظیموں کی جانب سے قابض اسرائیل کے غزہ پر جاری وحشیانہ حملوں کے خلاف جلوس اور احتجاجی مظاہرے منعقد کیے گئے۔
دارالحکومت لسبون میں “روسیو” اسکوائر پر ایک پُراثر تقریب ہوئی، جہاں 18 ہزار 726 معصوم بچوں کے نام پڑھے گئے جو 7 اکتوبر سنہ 2023ء سے غزہ پر جاری نسل کشی کی جنگ میں شہید کیے گئے۔ یہ منظر دل کو چیر دینے والا تھا جو اس عظیم انسانی سانحے کی شدت کو بیان کر رہا تھا۔
جنوبی پرتگال کے شہر فارو میں ہزاروں افراد نے ایک عظیم الشان ریلی نکالی۔ شرکاء نے فلسطینی پرچم اٹھا رکھے تھے اور فلک شگاف نعرے لگا رہے تھے جن میں قابض اسرائیل کے حملے روکنے اور بھوک کو ہتھیار بنانے کی مجرمانہ پالیسی کے خاتمے کا مطالبہ شامل تھا۔ شرکاء نے اس بات پر زور دیا کہ وہ فلسطینی عوام کی آزادی کی جدوجہد میں ان کے شانہ بشانہ کھڑے ہیں۔
اسی سلسلے میں “پرتگالی تحریک برائے حقوقِ عوامِ فلسطین اور مشرقِ وسطیٰ میں امن” نے مشہور سائیکل ریس میں “اسرائیل پریمیئر ٹیک” ٹیم کی شرکت کے خلاف مہم شروع کر دی۔ اس اقدام کو امن پسندوں کے جذبات کے ساتھ کھلی اشتعال انگیزی قرار دیا گیا، خصوصاً اس وقت جب عالمی عدالتِ انصاف قابض اسرائیل پر نسل کشی اور انسانیت کے خلاف جرائم کے الزامات کی سماعت کر رہی ہے۔
قابض اسرائیل کو امریکہ کی کھلی پشت پناہی حاصل ہے اور وہ 7 اکتوبر سنہ 2023ء سے غزہ میں اجتماعی نسل کشی کے جرائم پر عمل پیرا ہے، جن میں اب تک 2 لاکھ 11 ہزار سے زائد فلسطینی یا تو شہید ہو چکے ہیں یا زخمی، جن میں اکثریت عورتوں اور بچوں کی ہے۔ اس کے علاوہ 9 ہزار سے زائد افراد لاپتہ ہیں اور لاکھوں اپنے گھروں سے جبراً بے دخل کیے جا چکے ہیں۔
