غزہ – (مرکز اطلاعات فلسطین فاؤنڈیشن )
عالمی صمود و استقامت بیڑے (Global Resilience Flotilla) کے پہلے جہازوں کا پہلا گروپ اتوار 31 اگست 2025ء کو بارسلونا شہر سے غزہ کے ساحلوں کی جانب روانہ ہوگا۔
جہازوں کا دوسرا گروپ چار دن بعد تونس اور دیگر بندرگاہوں سے روانہ ہوگا، جس کی تفصیلات کا اعلان بعد میں کیا جائے گا۔
بحیرہ روم کے وسط میں یہ تمام جہاز ایک دوسرے سے ملیں گے اور پھر اسرائیلی بحری ناکہ بندی کو توڑنے کے لیے غزہ کی طرف سب سے بڑی مشترکہ بحری کارروائی میں شامل ہوں گے۔
یہ جہاز اپنے ساتھ انسانی اور طبی امداد کے علاوہ متعدد بااثر اور عوامی شخصیات کو بھی لے جائیں گے جو فلسطینی عوام کی جدوجہد اور انصاف کے لیے عالمی سطح پر شہرت رکھتے ہیں۔
یہ مشن تین بین الاقوامی تنظیموں کی مربوط کوششوں کے تحت شروع کیا جا رہا ہے، جو 44 سے زائد ممالک سے تعلق رکھتی ہیں۔ یہ تنظیمیں گزشتہ ماہ تونس میں اکٹھی ہوئی تھیں اور انہوں نے اپنی مشترکہ کارروائی کے طور پر “عالمی استقامت بیڑے” کو منظم کرنے کا اعلان کیا تھا۔
