برسلز –(مرکز اطلاعات فلسطین فاؤنڈیشن ) قابض اسرائیلی ریاست کے جنگی جرائم پر دنیا کی خاموشی کو چیلنج کرتے ہوئے بیلجیم کی وفاقی پولیس نے دو اسرائیلی فوجی اہلکاروں کو گرفتار کر لیا ہے، جن پر غزہ میں انسانیت سوز مظالم، قتل عام اور جنگی جرائم میں ملوث ہونے کے سنگین الزامات عائد ہیں۔
یہ گرفتاری دو عالمی انسانی حقوق کی تنظیموں کی طرف سے دی گئی باضابطہ شکایت کی بنیاد پر عمل میں آئی، جنہوں نے ان اہلکاروں کی غزہ میں جاری صہیونی جارحیت میں شرکت کی نشاندہی کی۔
پیر کے روز جاری کردہ بیان میں انسانی حقوق کی معروف تنظیم “ہند رجب فاؤنڈیشن” (HRF) نے تصدیق کی کہ دونوں اسرائیلی فوجی بیلجیم کے شہر “بوم” میں منعقد ہونے والے عالمی شہرت یافتہ “ٹومورولینڈ میوزک فیسٹیول” میں شرکت کے لیے موجود تھے۔ وہیں ان کی شناخت کی گئی اور انہیں فوری طور پر حراست میں لے لیا گیا۔
بیان میں مزید کہا گیا ہے کہ “دونوں مشتبہ افراد کی شناخت فیسٹیول کے دوران کر کے انہیں گرفتار کیا گیا۔ ان پر غزہ میں قابض اسرائیلی افواج کی جانب سے انجام دیے گئے جنگی جرائم میں براہِ راست ملوث ہونے کا شبہ ہے”۔
بیلجیم کے مستند تحقیقی ادارے “مڈل ایسٹ آئی” کے مطابق، گرفتاری کے بعد دونوں فوجی اہلکاروں سے باضابطہ تفتیش کی گئی۔ تاہم، تفتیشی عمل کے بعد انہیں عارضی طور پر رہا کر دیا گیا۔
اس کے باوجود بیلجیم کے فیڈرل پراسیکیوٹر جنرل کے دفتر نے اعلان کیا ہے کہ جنگی جرائم کے الزامات پر باقاعدہ فوجداری تحقیقات جاری ہیں۔
یہ شکایت گزشتہ ہفتے انسانی حقوق کے لیے سرگرم دو بین الاقوامی تنظیموں “ہند رجب فاؤنڈیشن” اور “گلوبل لیگل ایکشن نیٹ ورک” (GLAN) نے پیش کی تھی۔ ان تنظیموں نے ثبوت اور شواہد پر مبنی دستاویزات جمع کراتے ہوئے بیلجیم کے عدالتی نظام کو متحرک کیا۔
بیلجیم میں اسرائیلی فوجیوں کی گرفتاری ایک اہم پیش رفت ہے، جو اس بات کی علامت ہے کہ دنیا بھر میں ضمیر بیدار ہو رہا ہے۔ وہ صہیونی افسران، جو آج تک غزہ کے نہتے عوام پر بمباری، بچوں کی لاشیں اور ہسپتالوں کی تباہی کے ذمہ دار تھے، اب خود قانون کے شکنجے میں آ رہے ہیں۔
