غزہ – (مرکز اطلاعات فلسطین فاؤنڈیشن)
اسلامی تحریک مزاحمت حماس کے عسکری ونگ القسام بریگیڈز نے اعلان کیا ہے کہ انہوں نے جنوبی غزہ کے شہر خان یونس کے قریب ایک قابض اسرائیلی بکتر بند گاڑی کو انتہائی طاقتور دھماکا خیز ڈیوائس سے نشانہ بنایا، جس کے نتیجے میں متعدد دشمن فوج کے اہلکار ہلاک اور زخمی ہوئے۔
القسام بریگیڈز نے اپنے عسکری بیان میں کہا کہ خان یونس کے شمال مشرقی علاقے الزنہ میں ایک اسرائیلی بکتر بند گاڑی کو ایک خاص نوعیت کی بارودی بیرل سے نشانہ بنایا گیا، جس نے گاڑی میں سوار دشمن فوجیوں کو موت اور زخمی ہونے کے درمیان لا کھڑا کیا۔
بیان میں مزید کہا گیا ہے کہ حملے کے بعد القسام کے مجاہدین نے مشاہدہ کیا کہ قابض اسرائیلی فوج کی ایئر ایمبولینسز خان یونس کے مشرق میں فوری طور پر زخمیوں کو نکالنے کے لیے اتریں۔
اس سے قبل بھی آج القسام بریگیڈز نے قابض اسرائیلی فوج کی قیادت اور کنٹرول کے ایک اہم مرکز کو موراج کے محاذ پر، جو کہ جنوبی خان یونس کے قریب واقع ہے، بھاری مارٹر گولوں سے نشانہ بنایا۔ اسی طرح مشرقی غزہ کے التفاح محلے میں دارالارقم اسکول کے قریب ایک اور صہیونی تنصیب کو بھی شدید گولہ باری کا نشانہ بنایا گیا۔
گزشتہ دنوں کے دوران پورے غزہ میں قابض اسرائیلی فوج کے زمینی حملوں کے مختلف محاذوں پر فلسطینی مزاحمت کاروں کی کارروائیوں میں تیزی آئی ہے، خصوصاً جنوبی علاقوں خان یونس اور رفح میں، جہاں دشمن کو بھاری جانی و مالی نقصان اٹھانا پڑا ہے۔
قابض اسرائیل کی جانب سے فلسطینی عوام پر مسلسل ڈھائے جانے والے مظالم، زمین پر قبضہ، گھروں کی تباہی اور انسانی حقوق کی بدترین پامالی کے خلاف القسام بریگیڈز کی یہ جوابی کارروائیاں فلسطینی قوم کے جذبۂ حریت اور مزاحمت کی علامت بن چکی ہیں۔
