دوحہ – (مرکز اطلاعات فلسطین فاؤنڈیشن ) اسلامی تحریک مزاحمت حماس نے کہا ہے کہ برادر ملک یمن پر قابض اسرائیل کا حملہ ایک سنگین جنگی جرم، ایک عرب ملک کی خودمختاری کی کھلی پامالی اور بین الاقوامی قوانین و روایات کی صریح خلاف ورزی ہے۔
حماس نے اپنے ایک اخباری بیان میں کہا کہ یمن پر یہ جارحیت، اور اس کے ساتھ ساتھ شام، لبنان اور غزہ پر قابض اسرائیل کی جاری درندگی، عرب اور اسلامی دنیا کے عوام کے لیے اس ریاست کے حقیقی خطرے کو ظاہر کرتی ہے اور اس کی دہشت گردانہ اور توسیع پسندانہ پالیسیوں کی تصدیق کرتی ہے۔
بیان میں مزید کہا گیا کہ یہ حملے قابض اسرائیلی وزیرِ اعظم بنجمن نیتن یاہو کے اس نام نہاد “گریٹر اسرائیل” منصوبے کے اعلان کردہ موقف کے تسلسل میں کیے جا رہے ہیں۔
حماس نے یمن کے عوام، ان کی مسلح افواج اور انصار اللہ تحریک کے ساتھ اپنی مکمل یکجہتی کا اظہار کیا اور کہا کہ اسرائیلی دہشت گردی انہیں غزہ اور فلسطین کی حمایت جاری رکھنے سے باز نہیں رکھ سکے گی۔
بیان کے اختتام پر حماس نے عالمی برادری، اقوام متحدہ، عرب ممالک اور مسلم دنیا سے مطالبہ کیا کہ وہ اپنی ذمہ داریاں پوری کریں اور قابض اسرائیل کو فلسطینی عوام اور دیگر عرب اقوام کے خلاف اپنی درندگی روکنے پر مجبور کریں۔
