غرب اردن(مرکز اطلاعات فلسطین فاؤنڈیشن ) قابض اسرائیلی فوج نے منگل کے روز سلفیت کے مغرب میں واقع بروقین قصبے کے شمالی علاقے “الشعب” میں تین آباد مکانات کو مسمار کر دیا۔
مقامی ذرائع کے مطابق قابض فوج نے قصبے کے مغربی حصے سے دھاوا بولا اور چار فوجی بلڈوزروں کی مدد سے گھروں کو منہدم کیا۔ اس موقع پر علاقے کو سخت سکیورٹی حصار میں لے لیا گیا تھا۔
بتایا گیا ہے کہ یہ مکانات شہری بسام جمال الحج، سامر فایز الحج اور فرج عبد الناصر حج کی ملکیت تھے۔
ادارہ برائے انسداد آباد کاری کے مطابق قابض اسرائیلی حکام نے رواں سال کے ابتدائی چھ ماہ کے دوران 556 انہدامی نوٹس جاری کیے جن کا ہدف فلسطینیوں کے مکانات اور دیگر تنصیبات تھیں۔ ان میں 322 رہائشی مکانات اور 151 زرعی تنصیبات شامل ہیں۔ یہ سب کچھ صہیونی پالیسی کے تحت ہو رہا ہے جس کا مقصد بستیوں میں توسیع اور زمین پر نیا حقیقت مسلط کرنا ہے۔
غزہ کی پٹی میں جاری نسل کشی کی جنگ کے ساتھ ساتھ قابض فوج اور صہیونی آبادکاروں نے مقبوضہ مغربی کنارے بشمول مشرقی یروشلم میں اپنے مظالم تیز کر دیے ہیں۔ فلسطینی اعداد و شمار کے مطابق ان حملوں کے نتیجے میں اب تک کم از کم 1047 فلسطینی شہید ہو چکے ہیں، تقریباً 10300 زخمی ہوئے ہیں اور 19 ہزار سے زیادہ کو گرفتار کیا گیا ہے۔
