کراچی ( فلسطین فائونڈیشن پاکستان) کے زیر اہتمام کراچی پریس کلب کے سامنے صمود فلوٹیلا پر اسرائیلی حملہ اور جارحیت کے خلاف احتجاجی مظاہرہ کیا گیا جس میں سیکڑوں مرد و خواتین نے شرکت کی۔مظاہرین نے ہاتھوں میں پلے کارڈز اور بینرز اٹھا رکھے تھے جن پر صمود فلوٹیلا کی حمایت میں نعرے آویزاں تھے۔ احتجاجی مظاہرے سے مختلف سیاسی ومذہبی جماعتوں کے قائدین سمیت سول سوسائٹی اور انسانی حقوق کے نمائندوں بشمول ملی یکجہتی کونسل سندھ کے صدر اسد اللہ بھٹو، جماعت اسلامی کے نائب امیر ڈاکٹر معراج الہدیٰ صدیقی، سابق رکن سندھ اسمبلی میجر (ر) قمر عباس،پاکستان پیپلز پارٹی کے رہنما ارشد نقوی، جمعت علماء پاکستان کے رہنما علامہ عقیل انجم قادری، علامہ قاضی احمد نورانی،پاکستان مسلم لیگ نواز کے رہنما پیر ازہر علی شاہ ہمدانی، سابق رکن قومی اسمبلی محمد حسین محنتی، مجلس وحدت مسلمین کراچی کے صدر علامہ صادق جعفری، علامہ مبشر حسن، مرکزی مسلم لیگ کے رہنما فیصل بلوچ،عوامی نیشنل پارٹی کے رہنما یونس بونیری، پاکستان تحریک انصاف کی عرم بٹ،پاکستان نظریاتی پارٹی کے حمزہ نقوی، مسیحی رہنماپاسٹر ایمانوئیل، وکلاء رہنما حسیب جمالی، ہیومن رائٹس کونسل آف پاکستان کے جمشید حسین اور فلسطین فائونڈیشن پاکستان کے سیکرٹری جنرل ڈاکٹر صابر ابو مریم نے خطاب کیا۔
مقررین کاکہنا تھا کہ ٹرمپ پلان کو مسترد کرتے ہیں اور فلسطین کا مستقل فلسطینیوں کو طے کرنا چاہئیے ۔ ان کاکہنا تھا کہ امریکہ کو یہ حق حاصل نہیں ہے کہ امن کے نام پر فلسطین پر اسرائیلی قبضہ کو مسلط کرے، فلسطین ہمیشہ فلسطینوں کا تھا اور ہے ۔اسرائیل ایک غاصب اور ناجائز ریاست ہے۔ انہوںنے صمود فلوٹیلا پر اسرائیلی جارحیت کی شدید مذمت کی اور کہا کہ دنیا بھر کی حکومتوں اور خاص طور پر اسلامی و عرب حکومتوں کو چاہئیے کہ غزہ کے دفاع کے لئے مشترکہ حکمت عملی کا تعین کریں اور غزہ کا محاصرہ توڑنے کے لئے عملی اقدمات کریں۔
مقررین نے امریکی صدر ٹرمپ کے امن پلان کو فلسطین دشمن پلان قرار دیتے ہوئے وزیر اعظم شہباز شریف کی جانب سے پلان کی حمایت پر کڑی تنقید کرتے ہوئے وزیر اعظم سے مطالبہ کیا کہ وہ اپنے بیان کو واپس لیں ۔مقررین نے حکومت پاکستان سے مطالبہ کیا کہ فلسطین کاز کی حمایت میں بابائے قوم قائد اعظم محمد علی جناح اور علامہ اقبال کے موقف کی تجدید کی جائے ۔ اس موقع پر شرکاء نے امریکہ مردہ باد، اسرائیل نا منظور اور فلسطین کی آزادی کے نعرے لگائے۔ مظاہرے میں عبد الوحید یونس، یاور عباس، ابراھیم چترالی، اعجاز فضل، مفتی محمد سعید، نسرین حسین، جبین عالم، فرید میمن، قاضی زاہد حسین سمیت دیگر بھی موجود تھے۔
