غزہ (مرکزاطلاعات فلسطین فاؤنڈیشن) جنوبی غزہ کے مظلوم و محصور باسیوں کے دفاع میں برسرپیکار فلسطینی مزاحمتی قوتوں نے ایک اور صہیونی فوجی کو اس کے انجام تک پہنچا دیا۔ قابض اسرائیل کی جانب سے جاری قتل عام اور نسل کشی کے خلاف جاری عظیم معرکہ ’’طوفان الاقصیٰ‘‘ میں القسام بریگیڈز نے ایک صہیونی فوجی کو نشانہ بنایا، جو موقع پر ہی ہلاک ہو گیا۔
مرکزاطلاعات فلسطین کے مطابق بدھ کے روز جاری کیے گئے مختصر بیان میں القسام بریگیڈز نے اعلان کیا کہ انہوں نے اسلامی جہاد کی عسکری شاخ سرايا القدس کے ساتھ مل کر جنوبی غزہ میں ایک اسرائیلی فوجی کو قنص کیا، جو فوری طور پر مارا گیا۔
بیان میں کہا گیا کہ یہ کارروائی خانیونس کے مشرقی علاقے عبسان الکبیرہ میں اس وقت عمل میں لائی گئی جب القسام اور سرایا القدس کے جانباز مجاہدین نے دشمن کے فوجیوں کو نشانے پر لیا۔
بیان کے مطابق دشمن کے فوجی کو نشانے پر لینے کے فوراً بعد قابض اسرائیل کی ایک فوجی ہیلی کاپٹر کو اس کی لاش نکالنے کے لیے علاقے میں اترتے دیکھا گیا۔
اس واقعے کے بعد صہیونی ذرائع ابلاغ نے تصدیق کی ہے کہ قابض اسرائیلی فوج نے غزہ کے محاذ سے اپنے کئی زخمی فوجیوں کو ہیلی کاپٹر کے ذریعے مقبوضہ بیت المقدس کے ہسپتالوں میں منتقل کیا ہے۔
فلسطینی مزاحمت اپنی سرزمین, اپنے بچوں، اپنی ماؤں اور اپنے مقدسات کے تحفظ کی جنگ لڑ رہی ہے۔ اس جدوجہد کا ہر لمحہ صہیونی درندگی، نسل کشی اور جارحیت کے خلاف ایک مزاحمتی پیغام ہے۔ جب تک قابض اسرائیل کی سنگینیں معصوم فلسطینیوں کا خون بہاتی رہیں گی، اس ظلم کے خلاف بندوقیں اٹھانے والے بازو کبھی خاموش نہ ہوں گے۔
