غزہ ۔ (مرکز اطلاعات فلسطین فاؤنڈیشن ) یورومیڈیٹیرین ہیومن رائٹس مانیٹر نے کہا ہے کہ قابض اسرائیلی فوج کی جانب سے گذشتہ روز خان یونس کے ناصر میڈیکل کمپلیکس پر بمباری کے حوالے سے جاری کردہ بیان سراسر جھوٹ اور من گھڑت دعوؤں پر مبنی ہے، جو بین الاقوامی انسانی قوانین کی کھلی توہین اور ایک شرمناک مذاق ہے۔
مانیٹر نے اپنے بیان میں واضح کیا کہ اس کی فیلڈ ٹیم نے اسرائیلی فوج کے بیان کا ابتدائی جائزہ لیا، جس سے معلوم ہوا کہ قابض نے جو نام شائع کیے ان میں سے کئی افراد بمباری کے وقت وہاں موجود ہی نہیں تھے۔ تحقیقات سے ثابت ہوا کہ عمر ابو تیم ایک دن پہلے ہی شہید ہو چکے تھے، غالباً وہ اسرائیلی فوج کے ساتھ جھڑپ میں شہید ہوئے۔ اسی طرح محمد ابو ہدف اپنے اہل خانہ کے کئی افراد کے ساتھ اس وقت شہید ہوئے جب قابض اسرائیل نے مواصی القرارہ کے علاقے میں ایک خیمے پر بمباری کی۔ یہ واقعہ ناصر میڈیکل کمپلیکس پر حملے سے ایک روز قبل پیش آیا تھا۔
مانیٹر کی ٹیم نے مزید انکشاف کیا کہ جس کیمرے کو قابض فوج حماس کا قرار دے رہی ہے وہ دراصل رائٹرز کے فلسطینی صحافی حسام المصری کا تھا، جو اسرائیلی بمباری کی پہلی لہر میں ہی شہید ہو گئے تھے۔
یورومیڈیٹیرین ہیومن رائٹس مانیٹر نے کہا کہ اس کا فیلڈ عملہ قابض فوج کے بیان میں پیش کردہ باقی دعوؤں اور ناموں کی بھی باریک بینی سے جانچ کر رہا ہے تاکہ دنیا کے سامنے اسرائیلی جھوٹ پوری طرح بے نقاب کیا جا سکے۔
ادارے نے اس بات پر بھی زور دیا کہ قابض اسرائیل نے ایک بار پھر دنیا کے سامنے اپنی درندگی، سچائی سے کھلا انحراف اور انسانی اقدار کی پامالی کو آشکار کر دیا ہے۔ یہ جھوٹ نہ صرف شہداء کے خون کی توہین ہیں بلکہ پوری دنیا کے انسانی ضمیر کے ساتھ کھلی دشمنی ہے۔
یاد رہے کہ قابض اسرائیل کی جاری نسل کشی کے نتیجے میں اب تک 62 ہزار 744 فلسطینی شہید، ایک لاکھ 58 ہزار 259 زخمی، 9 ہزار سے زائد افراد لاپتہ، لاکھوں فلسطینی بے گھر ہو چکے ہیں جبکہ بھوک و قحط کے باعث مزید 300 فلسطینی شہید ہوئے ہیں، جن میں 117 معصوم بچے شامل ہیں۔
