غزہ (مرکز اطلاعات فلسطین فاؤنڈیشن) فلسطین کی وزارت صحت نے ایک انتہائی تشویشناک بیان میں واضح کیا ہے کہ غزہ کی خون کی لیبارٹریاں اور بلڈ بینک ہولناک حد تک خون کی قلت کا شکار ہو چکے ہیں۔ موجودہ ذخائر نہ صرف ضروریات پوری کرنے سے قاصر ہیں بلکہ انسانی زندگیوں کو بچانے کی صلاحیت بھی تیزی سے ختم ہو رہی ہے۔
پیر کے روز جاری کردہ بیان میں وزارت صحت نے بتایا کہ شدید زخمیوں کی تعداد میں مسلسل اضافہ ہو رہا ہے، جس کے باعث خون کی فوری ضرورت دن بہ دن بڑھتی جا رہی ہے لیکن جو مقدار دستیاب ہے وہ ماہانہ استعمال کے مقابلے میں نہایت قلیل ہے، اور اسے پورا کرنا بلڈ بینکس کی صلاحیت سے باہر ہو چکا ہے۔
اعداد و شمار کے مطابق، صرف گزشتہ ماہ کے دوران 10 ہزار خون کے یونٹس اور ان کے اجزاء استعمال کیے گئے، جبکہ دستیاب مقدار صرف 3500 یونٹس رہی۔ یہ خلا ہر گزرتے دن کے ساتھ خطرناک صورت اختیار کر رہا ہے۔
وزارت نے واضح کیا کہ معاشرتی سطح پر خون کے عطیات کی اپیلیں اب خاطر خواہ نتیجہ نہیں دے رہیں، کیونکہ شدید غذائی قلت اور آئرن کی کمی نے لوگوں کی جسمانی حالت کو بھی کمزور بنا دیا ہے۔
وزارت صحت نے عالمی اداروں اور انسان دوست تنظیموں سے فوری مداخلت کی اپیل کی ہے تاکہ بلڈ بینکس کے ذخائر میں اضافہ کیا جا سکے اور زخمیوں کو فوری طبی امداد فراہم کی جا سکے۔ یہ اقدام درجنوں جانوں کو بچانے کا سبب بن سکتا ہے۔
قابض اسرائیل کی جانب سے غزہ پر مسلط کی گئی ظالمانہ نسل کشی، جو پچھلے 21 ماہ سے جاری ہے، روزانہ درجنوں شہادتوں اور سینکڑوں زخمیوں کا سبب بن رہی ہے۔ یہ صورتحال نہ صرف غزہ کے ہسپتالوں بلکہ پورے صحت کے نظام کو مکمل طور پر مفلوج کرنے کے قریب پہنچا چکی ہے۔
فلسطینی عوام کو اس وقت جس بے بسی، کرب اور طبی بحران کا سامنا ہے، اس کی مثال حالیہ تاریخ میں کہیں نہیں ملتی۔ ہر زخمی کا جسم، ہر ماں کی پکار اور ہر خالی بلڈ بیگ عالمی ضمیر سے انصاف کی دہائی دے رہا ہے۔
