غزہ (مرکز اطلاعات فلسطین فاؤنڈیشن ) اسلامی تحریک مزاحمت حماس کے عسکری ونگ القسام بریگیڈز نے اعلان کیا کہ اس کے مجاہدین نے مغربی غزہ کے ساحلی پٹی میں واقع الشاطی کیمپ کے علاقے میں مسجد اسامہ کے قریب قابض اسرائیل کے ایک میرکاوا ٹینک اور ایک فوجی بلڈوزر کو نشانہ بنایا ہے۔
القسام بریگیڈز نے اپنی ٹیلیگرام سائٹ پر جاری بیان میں کہا کہ محاذوں سے لوٹنے والے ہمارے جانباز مجاہدین نے تصدیق کی ہے کہ انہوں نے 23 ستمبر سنہ2025ء کو مسجد اسامہ کے اطراف ایک صہیونی میرکافہ ٹینک کو “الیاسین 105” راکٹ اور “العمل الفدائی” دھماکہ خیز آلے سے نشانہ بنایا اور ایک D9 بلڈوزر کو “تاندوم” میزائل سے کامیابی کے ساتھ تباہ کیا۔
مزید یہ کہ القسام بریگیڈز نے اپنی آپریشنل سیریز “عصا موسیٰ” کے تحت جاری کردہ فوٹیج میں دکھایا ہے کہ کس طرح تل الہوا کے علاقے میں ایک اور میرکافہ ٹینک کو “الیاسین 105” سے نشانہ بنایا گیا۔
واضح رہے کہ القسام بریگیڈز اور فلسطینی مزاحمتی دھڑے معرکہ طوفان الاقصیٰ کے تحت قابض اسرائیل کی گھس بیٹھی فوج اور ان کی جارحانہ مشینری کے خلاف مسلسل مزاحمت کر رہے ہیں اور اس درندہ صفت دشمن کی جانب سے دو برس سے زائد عرصے سے جاری خونریز اور تباہ کن جنگ کا مقابلہ کر رہے ہیں۔
