دی ہیگ (مرکزاطلاعات فلسطین فاوؑنڈیشن) بین الاقوامی عدالت انصاف نے جمعہ کو کہا کہ جنوبی افریقہ نے اسرائیل کے خلاف نسل کشی کے مقدمے میں اضافی ہنگامی اقدامات کی فوری درخواست جمع کرائی ہے۔
خبر رساں ادارے روئٹرز نے رپورٹ کیا کہ جنوبی افریقہ نے کہا کہ بین الاقوامی عدالت انصاف کے حکم کردہ اقدامات غزہ میں بدلتے ہوئے حالات کے متناسب نہیں تھے۔
گذشتہ منگل کوجمہوریہ جنوبی افریقہ نے بین الاقوامی تعلقات اور تعاون کی وزارت کی طرف سے جاری کردہ ایک بیان میں اسرائیلی قابض حکام کی طرف سے رفح کو ضرورت سے زیادہ طاقت کے ساتھ خالی کرنے کے حکم پر “حیرت” کا اظہار کیا۔ ان کا کہنا تھا کہ اسرائیلی فوج رفح پر وسیع حملے کے لیے لوگوں کو وہاں سے نکالنے کا بہانہ تلاش کررہی ہے۔
انہوں نے کہا کہ غزہ کی پٹی کے جنوب میں واقع شہر رفح پر اسرائیلی قابض افواج کا حملہ پٹی میں زندہ بچ جانے والوں کی آخری پناہ گاہ کو تباہ کر دے گا۔
جنوبی افریقی حکومت نے غزہ کی پٹی میں ہونے والی پیش رفت کے بارے میں اپنی “گہری تشویش” کا اظہار کرتے ہوئے مزید کہا کہ “اسرائیل کی جانب سے ضرورت سے زیادہ طاقت کے ذریعے رفح کو فوری طور پر خالی کرنے کی ضرورت کے اعلان سے ہم خوفزدہ اور حیران ہیں”۔
مسلسل پانچویں روز بھی اسرائیلی قابض فوج نے رفح گورنری کے مشرق میں اپنی منظم بمباری اور گھروں اور محلوں کو تباہ کرنے کا سلسلہ جاری رکھا ہوا ہے۔
رفح میں مرکزی ہنگامی کمیٹی نے کہا کہ گورنری میں جاری تباہی کی جنگ میں گزشتہ 24 گھنٹوں کے دوران تقریباً 30 شہری شہید اور زخمی ہوئے جس سے آپریشن کے آغاز سے اب تک شہداء کی تعداد تقریباً 120 تک پہنچ گئی ہے اور سینکڑوں زخمی ہوئے ہیں۔
