جنیوا (مرکزاطلاعات فلسطین فاوؑنڈیشن) فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی کے کمشنر جنرل فلپ لازارینی نے کہا ہے کہ جنگ نے غزہ کے بچوں کا بچپن چھین لیا ہے۔
لازارینی نے مائیکرو بلاگنگ ویب سائٹ ’ایکس‘ پلیٹ فارم پر اپنے اکاؤنٹ پر ایک پوسٹ میں “غزہ کی پٹی میں بچے جن حالات سے گذرے ہیں ایسے حالات دنیا کے کسی دوسرے خطے کے بچوں کے ساتھ پیش نہیں آنے چاہئیں۔ ان میں سے بہت سے مارے گئےبڑی تعداد میں زخمی ہوئے اور ان میں سے بہت سے زندگی بھر کے لیے معذور ہو جائیں گے۔
انہوں نے کہا کہ “جو بچے زندہ بچ گئے وہ گہرے صدمے سے دوچار ہیں۔ ان کے اسکول تباہ ہو گئے اور انہوں نے ایک پورا تعلیمی سال کھو دیا۔ نہ کچھ سیکھا نہ کھیل سکے”۔ جنگ بندی کے بغیر ہماری ایک کھوئی ہوئی نسل ہوگی۔”
خیال رہے کہ گذشتہ 7 اکتوبر سے “اسرائیلی” قابض افواج غزہ کی پٹی پر تباہ کن جنگ کیے ہوئے ہے جس کے نتیجے میں دسیوں ہزار معصوم شہری شہید، زخمی اور لاپتہ ہونے کے علاوہ 20 لاکھ افراد بے گھرہوچکے ہیں۔ بنیادی ڈھانچے کا 70 فیصد سے زیادہ تباہ ہوچکا ہے اور غزہ کی سخت ناکہ بندی اور مسلسل جنگ کے نتیجے میں گنجان آباد علاقہ قحط کی لپیٹ میں ہے۔
ادویات، پانی اور خوراک کی قلت کے باعث آئے روز بچوں اور دیگرشہریوں کی اموات کی خبریں آ رہی ہیں۔ دوسری جانب غاصب صہیونی دشمن ریاست نے جنگ بندی کی تمام کوششیں ناکام بنا دی ہیں اور وہ غزہ میں فلسطینیوں کی منظم اور مسلسل نسل کشی پر پوری ڈھٹائی کے ساتھ قائم ہے۔
