مقبوضہ بیت المقدس – (مرکزاطلاعات فلسطین فاؤنڈیشن) قابض اسرائیلی فوج نے آج جمعہ کی صبح مقبوضہ القدس کے علاقے باب العامود میں فلسطینیوں کو نمازِ عید کی ادائیگی سے روک دیا ہے۔ اس موقع پر قابض پولیس کی بھاری نفری تعینات رہی اور قدیم شہر (اولڈ سٹی) کے گرد و نواح میں فوجی پابندیوں کو مزید سخت کر دیا گیا۔
مقامی ذرائع نے اطلاع دی ہے کہ قابض افواج نے باب الساہرہ کے مقام پر ان فلسطینیوں پر آنسو گیس کے گولے داغے جو مسجد اقصیٰ پہنچنے اور وہاں عائد پابندیوں کے باوجود قبلہ اول کے دروازوں کے قریب نمازِ عید ادا کرنے کی کوشش کر رہے تھے۔
ایک انتہائی تکلیف دہ منظر اس وقت دیکھنے کو ملا جب مسجد اقصیٰ کے اندر سے عید کی تکبیرات کی آوازیں تو بلند ہوئیں لیکن وہاں عید کی نماز ادا نہ کی جا سکی۔ مسجد اقصیٰ کو قابض دشمن کی جانب سے مسلسل اکیسویں روز بھی بند رکھا گیا ہے، جو کہ سنہ 1967ء میں اس پر ہونے والے غاصبانہ قبضے کے بعد اپنی نوعیت کا پہلا اور سنگین واقعہ ہے۔
اس صورتحال کے پیش نظر فلسطینی عوامی حلقوں کی جانب سے بڑے پیمانے پر اپیلیں کی گئی ہیں کہ عوام مسجد اقصیٰ کی جانب پیش قدمی کریں، اس کے قریب ترین مقامات پر پہرہ (رباط) دیں اور قابض اسرائیل کے اس ظالمانہ فیصلے کو پاش پاش کر دیں۔
