مقبوضہ بیت المقدس – (مرکزاطلاعات فلسطین فاؤنڈیشن) قابض اسرائیلی افواج نے آج جمعہ کی صبح شہر القدس کے گرد ونواح میں قائم فوجی ناکوں اور چیک پوسٹوں پر اپنے جارحانہ اقدامات میں مزید سختی کر دی ہے، جس کے باعث مغربی کنارے سے آنے والے ہزاروں فلسطینیوں کو رمضان المبارک کے دوسرے جمعہ کی نماز مسجد اقصیٰ میں ادا کرنے سے روک دیا گیا۔
ان سفاکانہ اقدامات کے تسلسل میں غاصب اسرائیلی فوج نے بیت لحم اور القدس کے درمیان حائل چیک پوسٹ 300 پر اپنے اہل خانہ کے ہمراہ آنے والے بچوں کو داخلے سے روک دیا، حالانکہ ان کے سرپرستوں کے پاس شہر میں داخلے کے سرکاری پرمٹ موجود تھے۔
عینی شاہدین نے تصدیق کی ہے کہ قابض فوج کے سپاہیوں نے 12 سال سے کم عمر بچوں کو گزرنے کی اجازت دینے سے انکار کر دیا، جس کے نتیجے میں چیک پوسٹ پر خاندان بکھر کر رہ گئے اور ان مناظر نے نمازیوں میں شدید غم و غصے کی لہر دوڑا دی۔
صبح صادق کے وقت سے ہی مغربی کنارے کے مختلف علاقوں سے ہزاروں فلسطینیوں نے قلندیہ اور 300 نامی فوجی ناکوں کا رخ کیا تاکہ مسجد اقصیٰ پہنچ کر اس کے مقدس صحنوں میں نماز ادا کر سکیں اور قبلہ اول کے ساتھ اپنی وفاداری کا ثبوت دے سکیں۔
دوسری جانب غاصب اسرائیلی فوج نے بڑی تعداد میں شہریوں کو پرمٹ نہ ہونے کا بہانہ بنا کر داخلے سے روک دیا، جبکہ قابض انتظامیہ نے پہلے یہ اعلان کیا تھا کہ رمضان کے ہر جمعہ کو مغربی کنارے کے صرف دس ہزار شہریوں کو داخلے کی اجازت دی جائے گی۔
غاصب حکام نے داخلے کے لیے عمر کی سخت شرائط بھی عائد کر رکھی ہیں، جن کے تحت صرف 55 سال سے زائد عمر کے مردوں اور 50 سال سے زائد عمر کی خواتین کو داخلے کی اجازت ہے، اس کے ساتھ ساتھ پورے ماہِ مقدس کے دوران مسجد اقصیٰ میں نماز کی ادائیگی کے لیے صرف ایک بار کا خصوصی پرمٹ حاصل کرنا لازم قرار دیا گیا ہے۔
قلندیہ اور 300 نامی فوجی ناکوں پر غاصب فوج کی بھاری نفری تعینات رہی اور نمازیوں کی آمد کی کوریج کرنے والے صحافیوں کو بھی شدید تضیق اور رکاوٹوں کا نشانہ بنایا گیا، جبکہ مقبوضہ بیت المقدس کے تمام داخلی راستوں پر سکیورٹی کے نام پر پہرہ سخت کر دیا گیا ہے۔
یہ پابندیاں غاصب اسرائیلی حکام کی اس جارحانہ پالیسی کا حصہ ہیں جو گذشتہ چند ہفتوں سے جاری ہے، جس میں مسجد اقصیٰ میں داخلے پر پابندیوں کے ساتھ ساتھ بڑے پیمانے پر بیدخلی، گرفتاریوں اور القدس میں رمضان المبارک کے استقبالی مظاہر کو روکنے کی کوششیں شامل ہیں تاکہ شہر کے اسلامی تشخص کو مسخ کیا جا سکے۔
