غزہ – (مرکزاطلاعات فلسطین فاؤنڈیشن) اسلامی تحریک مزاحمت ’حماس‘ نے کہا ہے کہ مقبوضہ مغربی کنارے کی زمینوں پر قائم گوش عتصیون بلاک کی ایفرٹ بستی کے اندر امریکہ کی جانب سے قونصلر خدمات کی فراہمی ایک خطرناک پیش رفت اور غاصب اسرائیلی قبضے کے یہود کاری کے منصوبوں کے ساتھ کھلی ملی بھگت ہے۔ حماس نے اسے بستیوں کی تعمیر کے غیر قانونی عمل کی عملی توثیق اور مغربی کنارے پر غاصب دشمن کے قبضے کو تسلیم کرنے کے مترادف قرار دیا ہے۔
بدھ کے روز جاری کردہ ایک بیان میں حماس نے زور دے کر کہا کہ یہ نیا فیصلہ امریکہ کے موقف میں پائے جانے والے تضاد کو بے نقاب کرتا ہے، جو ایک طرف تو مغربی کنارے کے الحاق کی مخالفت کا دعویٰ کرتا ہے جبکہ دوسری طرف ایسے زمینی اقدامات اٹھا رہا ہے جو اس الحاق کو مضبوط کرنے اور ہماری مقبوضہ سرزمین پر غاصب اسرائیل کی حاکمیت کو دوام بخشنے کا باعث بن رہے ہیں۔
حماس نے اس بات پر بھی سخت تشویش کا اظہار کیا کہ غیر قانونی بستیوں کے اندر باقاعدہ امریکی خدمات کی فراہمی بین الاقوامی قانون کی کھلی خلاف ورزی ہے، جو بستیوں کی تعمیر کو سنگین جرم قرار دیتا ہے۔ تحریک کے مطابق یہ ایک ایسی نئی سیاسی حقیقت مسلط کرنے کی کوشش ہے جو ہمارے فلسطینی عوام کے قومی حقوق کو ختم کرنے کی راہ ہموار کرتی ہے۔
بیان میں اس قدم کی سنگینی اور اس کے ممکنہ نتائج پر خبردار کرتے ہوئے کہا گیا کہ یہ اقدام خاص طور پر ان امریکی بیانات کے تناظر میں سامنے آیا ہے جو غاصب دشمن کو اپنے کنٹرول میں وسعت دینے کی ترغیب دیتے ہیں۔ حماس نے مطالبہ کیا کہ ہمارے عوام اور ہماری زمین کے خلاف اس جارحیت اور غاصبانہ تسلط کو روکنے کے لیے بین الاقوامی سطح پر دباؤ ڈالا جائے۔
امریکی حکام نے بائیڈن انتظامیہ کے اس نئے رجحان کا انکشاف کیا ہے جس کے تحت مقبوضہ مغربی کنارے کی زمینوں پر قائم غاصب اسرائیلی بستیوں کے اندر براہ راست قونصلر خدمات فراہم کی جائیں گی۔
ذرائع نے تصدیق کی ہے کہ امریکی سفارتی تاریخ میں اپنی نوعیت کا یہ پہلا اقدام رواں ہفتے سے عملی طور پر شروع ہو جائے گا، جس کے تحت ان علاقوں میں رہنے والے امریکی شہریوں کو پاسپورٹ کے اجراء کی سہولت فراہم کی جائے گی۔
عبرانی چینل 14 نے انکشاف کیا ہے کہ مقبوضہ بیت المقدس میں موجود امریکی قونصل خانے نے سنہ 1967ء کے بعد پہلی بار مقبوضہ مغربی کنارے کی ایک بستی میں اپنی شاخ کھول دی ہے۔
