غزہ – (مرکزاطلاعات فلسطین فاؤنڈیشن) ہلال احمر فلسطین نے مغربی کنارے میں واقع اپنے مرکزی گوداموں سے غزہ کی پٹی کے لیے اشد ضروری طبی امداد کی منتقلی کے ایک بڑے لاجسٹک آپریشن کے آغاز کی اطلاع دی ہے، جو آج بروز منگل مکمل کیا جائے گا۔ یہ طبی سامان کرم ابو سالم کراسنگ کے ذریعے غزہ پہنچایا جا رہا ہے۔
ہلال احمر نے بتایا کہ آج پانچ ٹرک روانہ ہوئے ہیں جن پر 111 پلیٹ فارمز لدے ہوئے ہیں، جن میں ادویات اور طبی محلول کے 3,284,684 یونٹس شامل ہیں۔
مزید تفصیلات بتاتے ہوئے کہا گیا کہ اس مشن کی تکمیل آج منگل کو ہونے کی توقع ہے، جس میں مزید چار ٹرکوں پر 83 پلیٹ فارمز روانہ کیے جائیں گے۔ یہ ادویات یورپی یونین اور انٹرنیشنل فیڈریشن آف ریڈ کراس کی جانب سے فراہم کی گئی ہیں جو عالمی ادارہ صحت کے گوداموں میں محفوظ تھیں۔ اس طرح اس پورے قافلے میں نو بڑے ٹرکوں پر مجموعی طور پر 194 پلیٹ فارمز لدی طبی امداد شامل ہو جائے گی۔
ہلال احمر نے اس بات کی تصدیق کی کہ اس قافلے کی روانگی ریڈ کراس کی بین الاقوامی کمیٹی کے ساتھ کئی ماہ تک جاری رہنے والی بھرپور کوآرڈینیشن اور کوششوں کا نتیجہ ہے۔
بیان میں وضاحت کی گئی کہ یہ قدم ان بار بار دی جانے والی انتباہات کے بعد اٹھایا گیا ہے جن میں غزہ میں ادویات کے ذخیرے اور ضروری طبی سامان کے ختم ہونے کے بارے میں خبردار کیا گیا تھا، تاکہ ہلال احمر کے زیر انتظام فیلڈ ہسپتالوں اور کلینکس کا کام جاری رہ سکے۔
یہ بھی بتایا گیا کہ ان طبی خریداریوں کے لیے یورپی یونین (ECHO)، انٹرنیشنل فیڈریشن آف ریڈ کراس اینڈ ریڈ کریسنٹ (IFRC) اور عرب آرگنائزیشن فار ریلیف اینڈ ڈویلپمنٹ (ARCO) جیسے بین الاقوامی شراکت داروں نے مالی تعاون اور مدد فراہم کی ہے۔
اس کے علاوہ سپین، برطانیہ، ناروے اور کینیڈا کی ریڈ کراس سوسائٹیوں نے بھی تعاون کیا جبکہ جلد کی بیماریوں کے علاج میں مدد کے لیے فلسطینی امریکن میڈیکل ایسوسی ایشن (PAMA) کا تعاون بھی شامل رہا۔
ہلال احمر نے اس بات پر زور دیا کہ ان امدادی سامان کی آمد اس بات کو یقینی بنانے کے لیے ایک بنیادی ستون ہے کہ غزہ کے نظام صحت کو درپیش کٹھن حالات میں شہریوں کو فراہم کی جانے والی ہنگامی صحت کی خدمات کا تسلسل برقرار رہے۔
واضح رہے کہ غزہ کی پٹی میں نظام صحت گذشتہ دو سالوں سے جاری غاصب اسرائیل کی جارحیت اور نسل کشی کی جنگ کے نتیجے میں طبی وسائل اور صلاحیتوں کے شدید فقدان کا شکار ہے، جبکہ اس دوران امداد اور طبی سامان کی غزہ منتقلی پر بھی پابندی عائد رہی ہے۔
غزہ میں بنیادی صحت کے مجموعی 157 مراکز میں سے 103 مراکز مکمل طور پر تباہ ہو چکے ہیں، جبکہ صرف 54 مراکز جزوی طور پر کام کر رہے ہیں۔
صحت کے اداروں کو براہ راست نشانہ بنانے کے نتیجے میں برقی اور الیکٹرو مکینیکل سسٹم تباہ ہو چکے ہیں، اس کے ساتھ ساتھ آکسیجن تیار کرنے والے 35 میں سے 25 سٹیشن اور 110 میں سے 61 بجلی کے جنریٹر بھی ملبے کا ڈھیر بن چکے ہیں۔
