غزہ، مغربی کنارے کے متفقہ انٹرمیڈیٹ نتائج مصالحت کی طرف پیش رفت: بحر

فلسطینی مجلس قانون سازکے ڈپٹی اسپیکر ڈاکٹر احمد بحر نے کہا ہے کہ متعدد رکاوٹوں کے باوجود قومی مفادات اور مطالبات پر کوئی سمجھوتہ نہیں کیا جائے گا۔ انہوں نے غزہ اور مغربی کنارے میں ایک ساتھ انٹرمیڈیٹ کے نتائج کے اعلان کو فلسطینی مصالحت کی جانب پیش رفت قرار دیا۔ بحر نے مغربی کنارے میں انٹرمیڈیٹ کے امتحان میں پوزیشن ہولڈرز کے اعزاز میں تقریب سے خطاب کرتے ہوئے کہا کہ انتہائی مشکلات کے باوجود راستے سے پیچھے ہٹنے یا کسی بھی سمجھوتے کی کوئی گنجائش نہیں۔ انہوں نے کہا کہ درد و الم کی تاریک رات سے ہی فتح کی صبح اور امید کی کرنیں نمودار ہوتی ہیں، اسی طرح ایک چیلنج کے گہرائی سے دوسرا چیلنج سامنے آتا رہے گا حتی کہ فلسطینی مصالحت کا خواب بھی شرمندہ تعبیر ہوجائے گا۔ آج ہم نے ایک بڑی کامیابی حاصل کر لی ہے۔ اس ہدف کے حصول کے لیے قوم نے بڑی جدوجہد کی ہے تب جا کر یہ شاندار نتائج حاصل ہوئے۔ انہوں نے کہا کہ غزہ کی پٹی اور مغربی کنارے میں ایک ساتھ انٹرمیڈیٹ کے نتائج کا اعلان ایک بڑی کامیابی ہے اسے علاقائی، ملکی اور عالمی سطح پر ایک مثال بنایا جا سکتا ہے۔ انہوں نے انٹرمیڈیٹ کے متفقہ نتائج کو فلسطین کے داخلی اتحاد اور فلسطینی مصالحت کے لیے انتہائی خوش کن قرار دیا۔