حماس رہنماؤں کی دوحہ میں ایرانی وفد سے اہم ملاقات

دوحہ – (مرکزاطلاعات فلسطین فاؤنڈیشن) اسلامی تحریک مزاحمت ’حماس‘ کی قیادت کے سربراہ محمد درویش اور تحریک کی اعلیٰ قیادت کے وفد نے قطری دارالحکومت دوحہ میں ایرانی سپریم کونسل کے سیکرٹری علی لاریجانی سے ملاقات کی جس میں خطے کی تازہ ترین سیاسی صورتحال اور قطاع غزہ پر جاری اسرائیلی جارحیت کے حوالے سے تبادلہ خیال کیا گیا۔

ملاقات کے دوران محمد درویش نے غزہ کی مجموعی میدانی اور انسانی صورتحال کا جائزہ پیش کیا اور بتایا کہ کس طرح قابض اسرائیل ہمارے فلسطینی عوام کے خلاف اپنے جرائم کا سلسلہ جاری رکھے ہوئے ہے اور سیز فائر معاہدے کی دفعات سے انحراف کر رہا ہے۔ انہوں نے واضح کیا کہ حماس معاہدے کی شقوں پر عمل درآمد اور دوبارہ جنگ کی طرف نہ لوٹنے کی خواہاں ہے۔

انہوں نے اس بات پر زور دیا کہ فلسطینی مزاحمت میدان میں اپنی پامردی اور ثابت قدمی جاری رکھے ہوئے ہے اور اپنے عوام کے دفاع کے عہد اور وابستگی کو نبھاتے ہوئے اپنی قومی و اخلاقی ذمہ داریاں پوری کر رہی ہے۔ مزاحمت ہر ممکن طریقے سے جارحیت کو روکنے، محاصرہ ختم کرنے، انسانی و امدادی سامان کی فراہمی یقینی بنانے اور قطاع غزہ کے صابر عوام کے زخموں پر مرہم رکھنے کے لیے کوشاں ہے۔

ملاقات میں مقبوضہ بیت المقدس اور مغربی کنارے میں جاری کشیدگی پر بھی بات کی گئی، جہاں قابض اسرائیلی پالیسیاں اور مجرمانہ اقدامات مسلسل جاری ہیں۔ خاص طور پر اسرائیلی کنیسٹ کی جانب سے مقبوضہ مغربی کنارے کی زمینوں کے الحاق کے فیصلوں کی منظوری کو ایک خطرناک قدم قرار دیا گیا جو فلسطینی عوام کے مسلمہ قومی حقوق پر براہِ راست حملہ ہے۔

محمد درویش نے ایران کے ساتھ حماس کی مکمل یکجہتی کا اعادہ کیا اور ایرانی سرزمین کو نشانہ بنانے والی کسی بھی جارحیت کو مسترد کرتے ہوئے کہا کہ اسلامی جمہوریہ ایران یا خطے کے کسی بھی دوسرے ملک پر حملہ پورے خطے کے امن و استحکام کو داؤ پر لگا دے گا۔

دوسری جانب علی لاریجانی نے حماس کی قیادت کو اسلامی جمہوریہ ایران کی موجودہ صورتحال اور امریکہ کے ساتھ جاری مذاکرات کے حوالے سے تازہ ترین پیش رفت سے آگاہ کیا۔

علی لاریجانی نے قضیہ فلسطین کی حمایت میں اپنے ملک کے غیر متزلزل موقف پر زور دیا اور فلسطینی عوام کی قربانیوں، ثابت قدمی اور مزاحمت کو خراجِ تحسین پیش کیا۔ انہوں نے یقین دلایا کہ اسلامی جمہوریہ ایران تمام میدانوں اور عالمی فورمز پر فلسطینی جدوجہد کی حمایت جاری رکھے گا۔

انہوں نے مزید کہا کہ فلسطینی عوام نے اس مرحلے میں ثابت قدمی اور ایثار کی جو تابندہ مثالیں قائم کی ہیں وہ چیلنجز کے سامنے ان کے پختہ ارادے کی عکاسی کرتی ہیں۔

اس ملاقات میں خالد مشعل، نزار عوض اللہ، حسام بدران، سامی خاطر اور باسم نعیم بھی شریک تھے۔