میساچوسٹس – (مرکزاطلاعات فلسطین فاؤنڈیشن) امریکہ کی ٹافٹس یونیورسٹی میں پی ایچ ڈی کی طالبہ رمیساء اوزتورک کے وکلاء نے بتایا ہے کہ ایک جج نے صدر ڈونلڈ ٹرمپ کی انتظامیہ کی جانب سے انہیں ملک بدر کرنے کی کوششوں کو مسترد کر دیا ہے۔ رمیساء کو گذشتہ برس امریکی یونیورسٹیوں میں فلسطین نواز کارکنوں کے خلاف چلائی جانے والی مہم کے دوران گرفتار کیا گیا تھا۔
امریکی کورٹ آف اپیل میں پیش کی گئی ایک یادداشت میں رمیساء اوزتورک کے وکلاء نے امیگریشن جج کے فیصلے کی تفصیلات پیش کیں، یہ یادداشت اس فیصلے پر نظرثانی کے فریم ورک کے تحت جمع کرائی گئی جس کے نتیجے میں گذشتہ مئی میں انہیں مہاجر حراستی مرکز سے رہا کیا گیا تھا۔
امریکن سول لبرٹیز یونین کے وکلاء نے اشارہ کیا کہ امیگریشن جج نے سنہ 29 جنوری کو یہ نتیجہ اخذ کیا کہ ہوم لینڈ سکیورٹی کا محکمہ رمیساء کی ملک بدری کے لیے کوئی قانونی جواز ثابت کرنے میں ناکام رہا ہے، جس پر جج نے ان کے خلاف کارروائی ختم کرنے کا حکم دیا۔
رمیساء اوزتورک کو گذشتہ برس سنہ 25 مارچ کو اس وقت گرفتار کیا گیا تھا جب وہ اپنے دوستوں کے ساتھ افطار کے لیے جا رہی تھیں۔ اس موقع پر امریکی امیگریشن اینڈ کسٹمز انفورسمنٹ ایجنسی کے چھ نقاب پوش اہلکاروں نے انہیں روک کر حراست میں لیا تھا۔
اس وقت امریکی وزیر خارجہ مارکو روبیو نے رمیساء کا تعلیمی ویزا منسوخ کرنے کا اعلان کرتے ہوئے ان پر حماس کا حامی ہونے کا الزام عائد کیا تھا۔ انہوں نے یہ بھی بتایا تھا کہ اسی طرح کے بہانوں کے تحت 300 سے زائد غیر ملکی طلبہ کے ویزے منسوخ کیے گئے ہیں۔
بعد ازاں جج ڈینس کیسپر نے رمیساء کی ملک بدری روکنے کا حکم جاری کیا، جبکہ ٹافٹس یونیورسٹی کی انتظامیہ نے بھی ان کی رہائی کا مطالبہ کیا۔ یونیورسٹی کے صدر سنیل کمار نے ان کی گرفتاری کو یونیورسٹی کے اندر بین الاقوامی برادری کے لیے مفلوج کن قرار دیتے ہوئے کیمپس کی سلامتی سے متعلق خدشات کا اظہار کیا تھا۔
تین گھنٹے تک جاری رہنے والی سماعت کے بعد ریاست ورمونٹ کی فیڈرل کورٹ کے جج ولیم کے سیشنز نے رمیساء اوزتورک کو ضمانت پر رہا کرنے کا حکم دیا، جس کے ساتھ ہی گذشتہ نو مئی کو ریاست لوزیانا میں ان کی چھ ہفتوں پر محیط حراست کا خاتمہ ہو گیا۔
