جدہ (مرکزاطلاعات فلسطین فاؤنڈیشن) نائب وزیرِ اعظم و وزیرِ خارجہ سینیٹر محمد اسحاق ڈار نے اسرائیل کے نام نہاد ’صومالی لینڈ‘ کو تسلیم کرنے کے اقدام کو غیر قانونی اور بین الاقوامی قوانین کے منافی قرار دیتے ہوئے صومالیہ کی خودمختاری اور علاقائی سالمیت کے لیے پاکستان کی مکمل حمایت کا اعادہ کیا۔
اتوار کو وزارت خارجہ سے جاری بیان کے مطابق، انہوں نے او آئی سی کونسل آف وزرائے خارجہ کے 22ویں غیر معمولی اجلاس سے خطاب میں کہا کہ یہ اقدام ایک خطرناک نظیر قائم کرتا ہے جس کے افریقہ اور عالمی سطح پر امن و سلامتی پر سنگین اثرات مرتب ہو سکتے ہیں۔
نائب وزیرِ اعظم نے فلسطینی کاز کے لیے پاکستان کے غیر متزلزل عزم کو اجاگر کرتے ہوئے کہا کہ پاکستان 1967ء سے قبل کی سرحدوں پر مبنی، آزاد، متصل اور خودمختار فلسطین کے قیام کی حمایت جاری رکھے گا، جس کا دارالحکومت القدس الشریف ہو۔
انہوں نے او آئی سی پر زور دیا کہ وہ جموں و کشمیر کے معاملے میں اپنی کوششوں کو تیز کرے اور کشمیری عوام کے حقِ خود ارادیت کو اقوامِ متحدہ کی سلامتی کونسل کی قراردادوں اور ان کی جائز امنگوں کے مطابق یقینی بنانے کے لیے عملی اقدامات کرے۔
