ویٹیکن کے سربراہ پوپ لیو نے فلسطینیوں اور اسرائیل کے درمیان جاری تنازع کے حوالے سے اپنا سخت مؤقف دہرا دیا اور خطے میں دہائیوں سے جاری خونریز کشیدگی اور انسانی المیے کے خاتمے کی ضرورت پر زور دیا۔
اتوار کے روز جاری بیان میں پوپ نے فلسطینی عوام پر اسرائیلی جارحیت کے نتیجے میں پیدا ہونے والے انسانی بحران کی سنگینی اجاگر کی۔ انہوں نے غزہ میں 7 اکتوبر 2023ء سے جاری منظم قتل و غارت، تباہی، جبری بے دخلی اور گرفتاریاں “ایسے اقدامات” قرار دیے جو عالمی ضمیر کو جھنجھوڑ دیتے ہیں۔پوپ لیو نے کہا کہ بین الاقوامی عدالت انصاف کی جانب سے قتل عام روکنے کے احکامات کے باوجود قابض اسرائیل اپنی وحشیانہ کارروائیوں سے باز نہیں آیا۔ انہوں نے انسانی نقصان پر گہری تشویش کا اظہار کرتے ہوئے بتایا کہ دو لاکھ اکتالیس ہزار سے زائد فلسطینی شہید یا زخمی ہو چکے ہیں، جن میں اکثریت خواتین اور بچوں کی ہے، جبکہ گیارہ ہزار سے زائد افراد لاپتہ ہیں۔انہوں نے مزید کہا کہ لاکھوں فلسطینی بے دخلی کے بعد کھلے آسمان تلے زندگی گزارنے پر مجبور ہیں اور بھوک نے سینکڑوں معصوم جانیں نگل لی ہیں، جن میں بچوں کی تعداد سب سے زیادہ ہے۔ غزہ کے بیشتر شہر ملبے کا ڈھیر بن چکے ہیں اور تباہی نے پوری انسانی تاریخ کو شرمندہ کر دیا ہے۔پوپ لیو کے اس بیان سے عالمی برادری پر زور دیا گیا ہے کہ وہ فلسطینی عوام کے انسانی المیے کو ختم کرنے اور مظالم روکنے کے لیے فوری اور مؤثر اقدامات کرے، کیونکہ دنیا اس المیے کے سامنے خاموش نہیں رہ سکتی۔
