کراچی – مرکزاطلاعات فلسطین فاؤنڈیشن
گورنر سندھ کامران خان ٹیسوری نے عالمی یومِ یکجہتیِ فلسطین کے موقع پر فلسطینی عوام کے ساتھ مکمل حمایت اور یکجہتی کا پیغام دیا۔
گورنر سندھ نے کہا کہ فلسطینی عوام کے ساتھ یکجہتی انسانیت کا تقاضا ہے اور مظلوموں کی حمایت ہر قوم کی اخلاقی ذمہ داری ہے۔ انہوں نے زور دیا کہ پاکستان ہمیشہ فلسطینی عوام کے حقِ خودارادیت کی جدوجہد کے ساتھ کھڑا رہا ہے اور یہ موقف برقرار رہے گا۔
کامران خان ٹیسوری نے عالمی برادری پر بھی اپیل کی کہ ظلم کے خلاف آواز بلند کی جائے اور فلسطینی عوام کے بنیادی حقوق کے تحفظ کے لیے فوری اقدامات کیے جائیں۔
انہوں نے مزید کہا کہ فلسطینی عوام کے ساتھ ہمدردی اور یکجہتی نہ صرف انسانی اقدار کی علامت ہے بلکہ عالمی امن کی مضبوط ضمانت بھی ہے۔
گورنر سندھ نے کہا کہ عالمی یومِ یکجہتیِ فلسطین کے موقع پر دنیا کو یہ سوچنے کی ضرورت ہے کہ فلسطینیوں کے ساتھ انصاف اور تعاون ہی پائیدار امن کی بنیاد ہے۔
