کراچی –مرکزاطلاعات فلسطین فاؤنڈیشن
یومِ یکجہتیِ فلسطین کے موقع پر مسلم لیگ فنکشنل سندھ کے رہنما سردار عبدالرحیم نے فلسطینی عوام کے ساتھ اپنی مکمل حمایت اور یکجہتی کا اظہار کرتے ہوئے عالمی برادری سے فوری اور مؤثر اقدامات کا مطالبہ کیا۔
سردار عبدالرحیم نے کہا کہ فلسطینی عوام پر جاری مظالم انسانی حقوق کی بدترین خلاف ورزی ہیں اور عالمی برادری کی خاموشی قابلِ تشویش ہے۔ انہوں نے واضح کیا کہ اقوامِ متحدہ کو محض بیانات دینے کے بجائے فلسطینی عوام کے حقوق کے تحفظ اور فوری انسانی امداد کی فراہمی کے لیے عملی اقدامات کرنے ہوں گے۔
انہوں نے کہا کہ پاکستانی قوم ہمیشہ فلسطینی عوام کے ساتھ کھڑی ہے اور فلسطینیوں کی جدوجہد دنیا بھر کے مظلوموں کے لیے حوصلے کا سرچشمہ ہے۔ سردار عبدالرحیم نے عالمی برادری سے اپیل کی کہ غزہ میں جاری بربریت فوری طور پر بند کرائی جائے اور شہریوں کی حفاظت یقینی بنائی جائے۔
انہوں نے زور دیا کہ بے گناہ بچوں اور خواتین کا قتل عام دنیا کے ضمیر پر سوالیہ نشان ہے اور فلسطینی عوام کی حمایت پاکستان مسلم لیگ فنکشنل کی ہر دور میں جاری رہے گی۔
سردار عبدالرحیم نے کہا کہ پاکستان کی اخلاقی، انسانی اور سیاسی حمایت فلسطینی عوام کے حقِ خودارادیت اور ان کی آزادی تک برقرار رہے گی۔
