یومِ یکجہتیِ فلسطین کے موقع پر وزیراعلیٰ سندھ سید مراد علی شاہ نے اپنے خصوصی پیغام میں فلسطینی عوام کی جدوجہد اور اسرائیلی مظالم کے خلاف واضح اور دوٹوک اظہارِ یکجہتی کیا۔
وزیراعلیٰ نے کہا کہ فلسطینی اپنی سرزمین کے دفاع کی منصفانہ جنگ لڑ رہے ہیں, جبکہ قابض اسرائیلی ریاست مسلسل انسانیت سوز جرائم کا ارتکاب کر رہی ہے۔ ان کا کہنا تھا کہ اسرائیلی جارحیت میں ہزاروں معصوم بچے اور خواتین شہید ہو رہی ہیں, جو پوری دنیا کے لیے لمحۂ فکریہ ہے۔مراد علی شاہ نے عالمی برادری اور ثالث ممالک پر زور دیا کہ جنگ بندی کے باوجود جاری اسرائیلی مظالم روکنے کے لیے مؤثر اور فوری اقدامات کریں۔ انہوں نے واضح کیا کہ دنیا اسرائیل کے ان جرائم کو مزید نظرانداز نہیں کر سکتی۔وزیراعلیٰ سندھ نے اقوامِ متحدہ سے بھی اپیل کی کہ وہ فلسطینیوں کی جاری نسل کشی کو رکوانے کے لیے عملی اور فوری قدم اٹھائے۔انہوں نے اس عزم کا اعادہ کیا کہ پاکستان مکمل طور پر آزاد فلسطینی ریاست کا حامی ہے، جس کا دارالحکومت بیت المقدس ہو۔آخر میں وزیراعلیٰ سندھ نے کہا کہ سندھ کے عوام فلسطین میں امن، آزادی اور ظلم کے خاتمے کے لیے دعاگو ہیں۔
