غزہ ۔ مرکزاطلاعات فلسطین فاؤنڈیشن
قابض اسرائیلی جنگی طیاروں نے پیر کی صبح غزہ کے مشرقی علاقوں پر کئی جارحانہ فضائی حملے کیے جبکہ توپ خانے سے گولہ باری کا سلسلہ بھی جاری رہا جو جنگ بندی کے معاہدے کی ایک اور کھلی خلاف ورزی ہے۔
مقامی ذرائع کے مطابق شمالی غزہ کے شہر بیت لاہیا کے تعلیمی علاقے میں قابض اسرائیل کی فضائی بمباری اور توپ خانے کی گولہ باری کی آوازیں مسلسل گونجتی رہیں۔
ہمارے نامہ نگار نے بتایا کہ فجر کے وقت سے ہی قابض اسرائیلی طیارے مشرقی خان یونس پر وقفے وقفے سے حملے کرتے رہے اور اس کے ساتھ توپ خانے سے سخت گولہ باری بھی کی گئی۔
اسی طرح قابض اسرائیلی طیاروں نے جنوبی غزہ کی شہر رفح پر بھی کئی حملے کیے اور ہیلی کاپٹروں سے اندھا دھند فائرنگ کی گئی۔
علاوہ ازیں قابض اسرائیلی فورسز نے غزہ شہر کے مشرقی حصے میں متعدد رہائشی عمارتوں کو بارودی دھماکوں سے تباہ کر دیا۔
واضح رہے کہ گذشتہ برس اکتوبر کی دہم تاریخ کو ہونے والی جنگ بندی کے بعد سے قابض اسرائیلی فوج نے سینکڑوں مرتبہ معاہدے کی خلاف ورزی کی ہے جن کے نتیجے میں اب تک تین سو انتالیس فلسطینی شہید اور آٹھ سو اکہتر زخمی ہو چکے ہیں۔
یہ جنگ بندی اس نسل کش جنگ کا خاتمہ تھی جو قابض اسرائیل نے سات اکتوبر سنہ2023 کو شروع کی اور دو برس تک جاری رکھی۔ اس ہولناک جنگ نے تقریباً ستر ہزار فلسطینیوں کو شہید کر دیا اور ایک لاکھ اکہتر ہزار کے قریب زخمی ہوئے جبکہ غزہ کی نوے فی صد شہری تنصیبات خاکستر ہو گئیں۔
