غزہ (مرکز اطلاعات فلسطین فاؤنڈیشن ) اسلامی تحریک مزاحمت ’حماس‘ کے عسکری ونگ القسام بریگیڈز نے منگل اور بدھ کی درمیانی شب قابض اسرائیل کے ہلاک فوجیوں کی لاشوں کی ایک نئی کھیپ بین الاقوامی ریڈ کراس کمیٹی کے حوالے کر دی۔
فلسطینی ذرائع ابلاغ کے مطابق ریڈ کراس کا ایک خصوصی قافلہ غزہ شہر پہنچا جہاں اس نے ان اسرائیلی فوجیوں کی لاشیں وصول کیں جنہیں القسام بریگیڈز نے قابض فوج کے حملوں کے دوران ہلاک کیا تھا۔
ذرائع کے مطابق ریڈ کراس کی گاڑیاں سخت سکیورٹی کے تحت ایک بند مقام پر داخل ہوئیں جہاں لاشوں کی حوالگی کا عمل مکمل کیا گیا۔
ادھر امریکی صدر ڈونلڈ ٹرمپ نے اپنے بیان میں کہا ہے کہ غزہ میں جنگ بندی اور قیدیوں کے تبادلے سے متعلق معاہدے کے دوسرے مرحلے کا آغاز ہو چکا ہے۔
انہوں نے اپنے سوشل میڈیا پلیٹ فارم ’’ٹروتھ سوشل‘‘ پر لکھاکہ “تمام 20 زندہ قیدی واپس آ چکے ہیں، مگر مشن ابھی ختم نہیں ہوا، کیونکہ قابض اسرائیل کے ہلاک فوجیوں کی لاشیں تاحال واپس نہیں کی گئیں۔ دوسرا مرحلہ اب شروع ہو رہا ہے”۔
واضح رہے کہ پیر کے روز ’حماس ‘نے اپنے پاس موجود تمام 20 زندہ اسرائیلی قیدیوں کو بین الاقوامی ریڈ کراس کمیٹی کے ذریعے رہا کیا تھا، جس کے بدلے قابض اسرائیل نے اپنی جیلوں میں قید تقریباً 2000 فلسطینی اسیران کو رہا کیا۔
یہ معاہدہ اس جنگ بندی کے پہلے مرحلے کے تحت عمل میں آیا تھا جو 10 اکتوبر کو غزہ کی پٹی میں نافذ ہوا۔ یہ معاہدہ مصر، قطر، امریکہ اور ترکیہ کی ثالثی میں شرم الشیخ میں ہونے والے بالواسطہ مذاکرات کے نتیجے میں طے پایا تھا۔ یہ معاہدہ دراصل سابق امریکی صدر ڈونلڈ ٹرمپ کی پیش کردہ تجویز پر مبنی تھا جسے حماس اور قابض اسرائیل نے ابتدائی مرحلے کے طور پر تسلیم کیا تھا۔
اسی دوران اقوام متحدہ نے منگل کی شب تصدیق کی کہ قابض اسرائیل نے اطلاع دی ہے کہ وہ بدھ سے غزہ میں صرف 300 امدادی ٹرکوں کو داخلے کی اجازت دے گا جو کہ طے شدہ مقدار کا محض نصف ہے۔
اقوام متحدہ نے مزید بتایا کہ قابض اسرائیل نے یہ بھی واضح کیا ہے کہ وہ غزہ کی پٹی میں ایندھن یا گیس کی فراہمی کی اجازت نہیں دے گا سوائے ان انتہائی محدود مقاصد کے جو اس کی اپنی طے کردہ ’’انسانی انفراسٹرکچر‘‘ کی ضروریات سے متعلق ہیں۔
یہ تازہ پیش رفت ایسے وقت میں سامنے آئی ہے جب قابض اسرائیل مسلسل انسانی امداد کو ہتھیار کے طور پر استعمال کرتے ہوئے غزہ کے عوام پر اجتماعی سزا مسلط کر رہا ہے تاکہ انہیں بھوک، بیماری اور محاصرے کے ذریعے جھکنے پر مجبور کیا جا سکے۔
