جنین — (مرکز اطلاعات فلسطین فاؤنڈیشن ) جنین کے جنوب میں واقع بلدہ عنزہ میں قابض اسرائیلی فوج کے وحشیانہ حملے کے دوران ایک فلسطینی نوجوان کو گولی مار کر شہید کر دیا گیا۔ دوسری جانب آج صبح سے ہی مغربی کنارے کے وسط میں رام اللہ کے شمال مشرقی علاقے ترمسعیا پر بھی صہیونی فوج کا دھاوا جاری ہے، جہاں گھروں پر چھاپے مارے جا رہے ہیں اور مکینوں سے میدانی تفتیش کی جا رہی ہے۔
فلسطینی وزارتِ صحت نے تصدیق کی ہے کہ 24 سالہ احمد جِهاد براہمہ قابض اسرائیلی فوج کی گولیوں کا نشانہ بن کر شہید ہوگئے۔
مقامی ذرائع کے مطابق احمد براہمہ کو کمر میں گولی لگی تھی، جس کے بعد انہیں شدید زخمی حالت میں ہسپتال منتقل کیا گیا مگر وہ جانبر نہ ہو سکے۔
آج بدھ کی صبح قابض اسرائیلی فوج نے جنین کی متعدد بستیوں پر چڑھائی کی اور بھاری مشینری و بکتر بند گاڑیاں صانور قصبے میں داخل کر دیں۔ فوجی سڑکوں پر پھیل گئے جس کے باعث بچوں کی زندگیوں کو لاحق خطرے کے پیش نظر اسکولوں میں تدریسی عمل معطل کرنا پڑا۔
ذرائع نے بتایا کہ قابض اسرائیلی فوج صبح کے وقت یعبد قصبے سے انخلا کر گئی جو جنین کے جنوب مغرب میں واقع ہے۔ وہاں کئی گھروں پر دھاوا بولا گیا جن میں بلدیہ کے سربراہ امجد عطاطرہ کا گھر بھی شامل تھا۔ قابض اہلکاروں نے گھروں کی تلاشی لی اور مکینوں سے موقع پر ہی پوچھ گچھ کی۔
مزید بتایا گیا کہ یعبد قصبے میں اسکولوں کو صبح 9 بجے تک تاخیر سے کھولنا پڑا کیونکہ بلدیہ چھ روز سے قابض اسرائیل کے محاصرے میں ہے۔ صہیونی فوج نے اس کے داخلی راستے مٹی کے ڈھیروں سے بند کر دیے ہیں اور قریبی دیہات پر بھی دھاوا بول کر سڑکوں پر پھیل گئی ہے۔
اسی طرح رام اللہ کے مشرق میں واقع ترمسعیا قصبے پر بھی قابض فوج کی یلغار جاری ہے اور قصبے کی گلیوں میں فوجی رکاوٹیں کھڑی کی گئی ہیں۔
مقامی ذرائع کے مطابق صہیونی فوج نے درجنوں گھروں پر دھاوا بول کر ان کے دروازے توڑ ڈالے، چاہے وہ آباد ہوں یا خالی۔ اس دوران 20 سے زیادہ گاڑیاں ضبط کر کے ایک مکان کے صحن میں کھڑی کر دی گئیں۔ کئی خاندانوں کو بتایا گیا کہ یہ یلغار کم از کم 48 گھنٹے تک جاری رہے گی۔
قابض اسرائیل کی غزہ میں جاری نسل کشی کے ساتھ ساتھ مغربی کنارے میں بھی قتلِ عام جاری ہے۔ سرکاری فلسطینی اعداد و شمار کے مطابق اب تک مغربی کنارے میں صہیونی فوج اور آبادکاروں نے 1,044 فلسطینیوں کو شہید، 10 ہزار 160 کو زخمی اور 19 ہزار سے زائد کو گرفتار کیا ہے۔
