بیجنگ (مرکز اطلاعات فلسطین فاؤنڈیشن ) چین کی وزارت خارجہ کے ترجمان گوہ جیا کون نے واضح الفاظ میں کہا ہے کہ غزہ فلسطینی عوام کی ملکیت ہے اور یہ فلسطین کی سرزمین کا اٹوٹ حصہ ہے۔
بیجنگ میں پیر کے روز ایک پریس کانفرنس کے دوران جب برطانیہ، کینیڈا، آسٹریلیا اور پرتگال کی جانب سے فلسطین کو تسلیم کرنے کے فیصلے پر بات کی گئی تو چینی ترجمان نے کہا کہ فلسطینی عوام کے جائز اور بنیادی قومی حقوق کی ضمانت دینا لازمی ہے اور اس کے لیے دو ریاستی حل پر عملدرآمد کیا جانا چاہیے۔
انہوں نے زور دے کر کہا کہ غزہ فلسطینی عوام کا ہے اور ان کی سرزمین کا ناقابل تقسیم حصہ ہے۔ ان کا کہنا تھا کہ فوری طور پر غزہ میں مکمل جنگ بندی ہونی چاہیے اور انسانی المیے کو کم کرنے کے لیے عملی اقدامات ناگزیر ہیں۔
امریکہ کی طرف اشارہ کرتے ہوئے چینی ترجمان نے کہا کہ جس ملک کا قابض اسرائیل پر خاص اثر و رسوخ ہے اسے اپنی ذمہ داریاں پوری کرنی چاہئیں۔
انہوں نے اس بات کی بھی تصدیق کی کہ چین عالمی برادری کے ساتھ مل کر غزہ میں فائر بندی کے قیام، فلسطینی عوام کے جائز قومی حقوق کی بحالی اور مسئلہ فلسطین کے منصفانہ، جامع اور پائیدار حل کے لیے تیار ہے۔
