دوحہ (مرکز اطلاعات فلسطین فاؤنڈیشن ) اسلامی تحریک مزاحمت ’حماس‘ نے اعلان کیا کہ غزہ میں جماعت کے سرکردہ رہ نما سربراہ خلیل الحیہ نے اپنے شہید فرزند ہمام الحیہ اور ان شہداء کی نماز جنازہ ادا کی جو قطر کے دارالحکومت دوحہ میں قابض اسرائیل کے بزدلانہ اور غدارانہ قاتلانہ حملے میں شہید ہوئے۔
حماس نے اپنے مختصر بیان میں واضح کیا کہ نماز جنازہ قطر کی سرکاری سکیورٹی انتظامات کے تحت ادا کی گئی۔
گذشتہ روز قطر کے دارالحکومت دوحہ میں ان شہداء کی تدفین کی گئی جنہیں قابض اسرائیل نے چند روز قبل حماس کے وفد پر حملے میں شہید کر دیا تھا۔
نماز جنازہ عصر کے بعد مسجد محمد بن عبد الوہاب میں ادا کی گئی۔
شہداء کو دوحہ کے مسیمیر قبرستان میں سپرد خاک کیا گیا۔ اس موقع پر قطر کے امیر شیخ تمیم بن حمد آل ثانی، ان کے ذاتی نمائندے شیخ جاسم بن حمد آل ثانی، وزیر داخلہ، قطر کی داخلی سلامتی فورس “لخویا” کے کمانڈر شیخ خلیفہ بن حمد آل ثانی، حماس کے کئی قائدین اور ہزاروں شہریوں و مقیمین نے شرکت کی۔
گذشتہ منگل کو قابض اسرائیلی طیاروں نے دوحہ میں حماس کی قیادت کی رہائش گاہوں کو متعدد میزائلوں سے نشانہ بنایا۔ اس وقت حماس کا وفد غزہ میں جنگ بندی کے لیے ٹرمپ کے پیش کردہ مجوزہ منصوبے پر تبادلہ خیال کر رہا تھا۔
حماس نے اعلان کیا کہ غزہ میں اپنے سربراہ خلیل الحیہ کی قیادت میں وفد حملے میں محفوظ رہا، تاہم ان کا بیٹا ہمام الحیہ اور ان کے دفتر ڈائریکٹر جهاد لبد شہید ہو گئے۔ اس کے ساتھ تین رفقا بھی جام شہادت نوش کر گئے، جن میں شہید عبداللہ عبد الواحد، شہید مؤمن حسونہ، شہید احمد عبد المالك اور قطر کی داخلی سلامتی فورس کے رکن شہید وکیل عریف بدر سعد محمد الحمیدی شامل تھے۔
